近日有食客大呻喺筲箕灣食咗個天價海鮮餐，直斥該店「當客水魚咁劏！」一份「油立仔」10條魚收1880元，一份「蘿蔔紫菜魚頭湯」收1580元，一行10人連茶水及加一連服務費，盛惠7896元。帖文惹來網民熱議，不少人認為貴得令人咋舌，直指「劏得就劏」、「五星酒店都食到啦」、「黐X線，智商稅」、「真正海鮮價」。惟該帖文隨後被樓主刪除。
該食客日前於Fb群組「飲食黑店大全」發文稱，上周五（3日）一行10人光顧筲箕灣一間食店，惟結果食到一肚氣，直指「真係唔開POST唔得！」帖文力數食店9宗罪，包括「落單時已向侍應說不想食斑馬瀨尿蝦，就夾硬逼我哋食」、「10條油立仔收千幾」、「個紫菜魚頭湯係我人生中飲過最貴嘅紫菜湯，得幾嚿急凍魚塊紫菜又唔夠爽，仲要每人分得細碗仔」、「個豬潤炒蜆啲豬潤醉（碎）到夾唔到」、「逼人叫兩個吊桶，啲吊桶仲要唔新鮮」、「蝦醬吊桶炒時蔬改豆苗加錢又唔講，出到嚟標晒水鹹到要洗腎」、「切餅費都要收180個，我差啲以為自己去咗酒店食」、「所有海鮮價錢又無講，個侍應完全唔理人感受係咁自SALE係咁自己落單」、「所有餸加大又無講」。
從樓主上載的賬單可見點了多款菜式，包括「鹹魚煎肉餅」138元、「豬潤炒蜆」208元、「2隻京蔥豉油皇尿蝦炒腸粉」876元、「糕蟹蒸肉餅配煲仔飯」800元、「生爆吊桶」498元、「油立仔」1880元「蘿蔔魚頭紫菜湯」1580元等，連每人20元茶水及10%服務費，埋單總共7896元。
不少網民看後，紛紛留言「水魚湯都唔使咁貴」、「千五蚊嘅紫菜湯，千八蚊嘅鹹煎魚……」、「筲箕灣有咁貴？」。隨後，樓主刪除了該帖文，但已被大批網民截圖瘋傳。
收藏
取消收藏
分享
