漸入金秋，又到大閘蟹豐收的季節。近年網購盛行，日前就有網民分享中伏經歷，指自己購買了40隻大閘蟹，收到後竟發現啲蟹唔新鮮，完全冇大閘蟹味，蟹肉又黑又霉，有部分仲要係死蟹，直言「40隻全部放喺垃圾桶」。帖文引起網民熱議，不少人都覺得「好嘔心」，話「睇完縮一縮」、「見到都唔開胃」，有人則「希望食環做嘢啦，打擊下，等啲人唔敢做黑心商人」。
事主於fb群組「香港大閘蟹關注組」發文，表示在某間網店購買了40隻大閘蟹，但拆開後發現大閘蟹不新鮮，完全冇大閘蟹味，有部分仲要係死蟹。他上傳與網店的對話內容，指仲有20隻大閘蟹尚未拆開，遂問店方「可唔可以退」，並直言「咁樣夾硬食，我真係驚食咗成家一齊要去醫院」。
店方回覆指，暫時未能提供退款，目前處理方法是補回隻數或現金待用券。事主不滿指「還敢下次？！」，並向店方提供兩個解決方案，「要麼我拍視頻給你每隻打開然後放進垃圾桶，打開幾隻就退多少隻」，「或者視頻直接發到網上，這樣就不用退錢也不讓補償任何」。樓主亦同時指出，「其實另外的20隻，也是沒一隻可以吃的，我們開了有問題，也看一下是否都不能吃，就抱着這個希望，沒想到全部都有問題」，然而店方再沒有回覆。
有網民分享幫襯同一網店的中伏經歷，指買了7隻6.5至7両的公蟹，收到後發現全部都嚴重不足秤，7隻蟹全部都係死蟹，全部啲肉都霉嘅仲要有幾隻又黑又臭嘅，直言「從未買咁差嘅蟹！」，她向店方投訴並要求退款，卻遭到拒絕。
其他同樣中伏的網民指，「未見過新鮮蟹啲殼軟到咁，仲出曬水，啲肉又粉又霉」；「啱啱買咗大閘蟹，嚟到發現蟹好軟，蟹肉好粉好霉，根本唔新鮮，食唔落，好失望，好唔開心」。
收藏
取消收藏
分享
稿件由上傳 · 文責自負 · 不代表本網立場
