稀思路/筆是機場
讀者喺生活中，可能不時都聽過「為你好」、「為下一代」呢啲說話，類似說話嘅意思，相信讀者們都相當明白，但唔同人做起上嚟，可能有差天共地嘅變化，用黑暴事件為例子，黑暴分子嘅「為一代好」，係荼毒佢哋同煽動佢哋上街；而正常人呢，係會話畀下一代聽，唔好畀政客呃到，唔好上街，更加唔好信啲似是而非嘅所謂宣傳。最近，筆者睇到單法庭新聞，係一個38歲文員因為收取由英國寄來嘅18本《羊村》刊物而被判監，坦白講，睇到呢種「相信黑暴，擁抱監獄」嘅新聞，筆者內心通常都有一句「何必呢？」
根據案情，一名38歲嘅男性文員，涉嫌代收由英國寄去香港嘅18本《羊村》繪本，之後畀海關查獲，日前（6日）喺法院承認一項「輸入煽動刊物」罪，被判監4個月。法官表明，涉案繪本均具煽動性質，而被告明知並夥同他人跨境輸入刊物，係助長海外人士繼續出版，散播危害國安訊息；惟法官同時接納，被告並非始作俑者，筆者相信呢個可能係未有重判被告嘅原因。
《羊村》繪本係乜東東？用法官嘅講法，就係繪本以狼比喻中央，旨在抹黑醜化中央為「邪惡橫蠻」。喺《羊村》繪本發布後，筆者「有幸」睇過其中一兩輯，用最淺白嘅說法，就係有人用羊嚟比喻抗爭者，而狼就係講中央，不斷美化一群羊如何抵抗狼，甚至連棄保潛逃嘅暴徒都美化一番。呢種帶有煽動性嘅刊物，絕對會荼毒到下一代，有人接收或代收呢啲「毒物」，當然亦要承擔後果。
喺呢件事上面，我哋可以睇到兩件事，最重要一樣嘢，係黑暴運動後，明顯係有人想用唔同方式搞「軟對抗」，仲想荼毒下一代。《羊村》唔係一本繪本，而有人仲要傳播呢本書，當中用意，不用說明，心領神會，咁亦體現喺香港以外，好多黑暴分子仲成日喺不同地方抹黑中央、香港嘅眾多活動上。佢哋嘅邏輯，就係離開咗香港，所以可以繼續宣揚黑暴，以為無成本，但咁係錯嘅！
以今次呢位文員哥哥為例，精人出口，笨人出手，人哋寄啲煽動刊物嚟，佢又願意收，咁寄嗰個無事，收嗰個咪出事囉；不論外國有咩朋友同手足都好，佢哋有咩寄畀人，有咩歪念要散播，佢哋喺外國可能暫時無事，但喺香港同佢哋同流合污，就好難無事。如果有人活在香港，而覺得仲可以反中亂港、對自己國家不利嘅，咁係睇低咗執法部門維護國安嘅決心。
有時候，騙徒手法層出不窮，無論幾多人受騙，總會繼續有人受騙，之前國安通緝犯許智峯喺網上煽動人喺選舉投白票，有人以為冇事，跟住又喺社交平台轉發叫人投白票，結果畀人拉、畀人告；講真，一班政客或黑暴分子，叫得攬炒派，唔止係佢哋想攬住政府嚟「炒」，係佢哋專攬住自己友嚟「炒」呢！黑暴運動過萬人被捕，就係「攬炒成果」，香港市民唔好再信班黑暴分子，因為佢哋無好關照，除咗畀坑自己友「踩」。
收藏
取消收藏
分享
