來論｜一個失敗的CEO——羅健熙

稀思路/筆是機場

一間公司或機構，如果有一個好嘅領導，機構發展會蒸蒸日上，甚至能夠扭轉劣勢，再創高峰，最明顯嘅例子，就有喬布斯回歸蘋果公司後，推出iPhone、iPad等產品，將蘋果起死回生，甚至推向世界巔峰。咁如果一間機構嘅領導唔掂會點？咁梗係會令間機構愈做愈差，甚至要倒閉。喺商界嘅道理，一樣適用於政界，就如民主黨由羅健熙接任主席後，「沒有最衰，只有更衰」，最近羅健熙話要派人參選區議會，但講真，佢連自己應該做咩都唔係好知喎。

本來，筆者都唔係好想再講民主黨或者羅健熙，但有啲嘢，睇到真係「忍唔住笑」，大約係上周六，筆者睇到篇新聞，羅健熙話擔心攞「間選名冊」（有地區三會成員資料）去尋求直接提名，或者會有風險，需要再詢問選管會有關名冊係咪可以用於爭取直接提名。

就咁睇以上內容，可能有人會覺得好正常，選舉每樣嘢都講法例、規則，有政黨驚攞咗名冊都唔以用於向不同人士爭取提名，看似「合情合理」，但筆者唔係對呢行完全無認識，真心認為羅健熙係喺度「派膠」；佢哋要參選，尤其係地區直選，係需要向地區三會成員爭取提名，但真正嘅問題在於，三會成員嘅名單係向公眾公開嘅，如果有心搵，就算唔靠政府嘅「間選名冊」，都應該搵到地區三會成員嘅聯絡，如果民主黨連咁基本嘅事都做唔到，仲話出嚟選？

但凡經歷過選舉嘅人，都知道要向特定人士爭取提名，一定要付出相應努力，例如係用盡人脈搵對方聯絡，然後就係真心誠意地搵對方，用理念說服對方提名自己；民主黨呢種態度，唔係諗住可以直接用「間選名冊」，然後打個電話、發個電郵就有人提名自己呀？依家嘅民主黨，正確嚟講就係社會嘅負資產，作風差，形象亦差，如果諗住做少少嘢就有人提名佢哋，咁就真係太天真喇！

由此仲可以睇到一樣嘢，就係佢哋嘅黨主席羅健熙，連最基本嘅政治智慧都無，喺公開場合講一啲講完等於冇講、甚至被認為民主黨愚蠢嘅說話；從前嘅民主黨，由司徒華到李柱銘，即使筆者唔同意佢哋政見，但真心講佢哋真係高羅健熙好多班，依家民主黨，講得難聽啲，用「廖化」去形容羅健熙似乎係侮辱咗歷史人物，連民主黨有咩問題、要做咩都唔知，仲想參選，有人提名佢哋，真係呢……

其實，唔止筆者一個人講過，民主黨要參選，必須先承認自己嘅過錯，民主黨已經唔係「和理非」，而係黑暴政黨，一個黑暴組織，想參選必須由愛國者組成嘅區議會，係咪可行呢？成日話自己都係愛國愛港，但愛國愛港，係要有相應行動支持，唔係自稱愛國人地就信。喺新聞報道中，羅健熙話自己「履職監察機制下，會堅持做自己覺得正確的事」，正確呢個詞，可能人言人殊，但筆者要再講一次，民主黨參與黑暴，一定係錯，如果羅健熙到今日都唔知咩事，以為自己及自己嘅政黨「冇問題」，咁落去，民主黨有前途嗎？請呢個失敗嘅CEO，諗下自己同民主黨做過咩先啦。