來論｜費城有「免費iPhone」？原來搶劫是美國日常

稀思路/筆是機場

喺中國，我哋偉大而繁華嘅祖國，近期因為華為推出有自家芯片嘅手機，出現一陣又一陣搶購潮，少量國產手機到香港，雖然價錢貴咗，但都有唔少市民捧場，因為華為嘅新手機，既意味國家喺芯片嘅突破，亦意味國家衝破咗美國嘅封鎖。喺美國又如何？當然係繼續熱捧佢哋引以為傲嘅iPhone，不過佢哋嘅「搶購」方式有啲特別，有人唔係真心白銀出錢買，而係真係去「搶」，厲害了美國！

喺當地時間25日晚上，大約有100名青年闖入費城（Philadelphia）市中心嘅多家商店，公然搶劫包括蘋果專賣店嘅商舖，當時，有網紅「好開心」咁直播，高呼「免費iPhone」，仲好興奮咁大笑、鼓掌，雖然眼前係一場瘋狂搶劫嘅行為，但佢就好似喺嘉年華咁開心，又聲稱「當我們在這座城市得不到正義時，就會發生這樣的事情。」

嗱，筆者評論一向公道，雖然呢位網紅以至其他人可能認為自己「好正義」，但搶劫、煽動始終係犯法嘅，跟住部分青年同呢位網紅都被警察帶上手扣帶走，美國當局就表示，從犯罪現場至少檢獲兩支槍，冇人受傷，目前已有至少52人被捕，其中仲有3人係未成年人士。除咗中心城區，費城北部亦有商店受到侵襲，當時就有店主同傳媒講，搶匪打爛玻璃並搶走物品，當地居民形容，呢啲青年無法無天，費城亦已經崩壞。

見微知著，費城嘅狀況，表面睇可以話係一場又一場搶劫，但本質上，係反映費城以至美國經濟唔掂、教育唔好、治安更差，因為一班青年去搶劫時，唔單止有人係瞄住價錢幾貴嘅iPhone去搶，而且表現出興奮嘅心態去搶劫，由此可見，美國真係病入膏肓。筆者睇返過去幾個月嘅新聞，今年7月初，費城就發生過搶擊案，導致4死4傷；6月初，費城街頭就出現一群群「街頭喪屍」，原來係大量吸毒者喺街頭聚集，之前筆者寫文亦分析過。

美國經常自詡世界第一，但邊方面世界第一呢？講GDP，美國的確係世界第一；講軍事，都可以肯定美軍軍力喺世界頂尖，但那又如何？一個GDP最高嘅國家，貧富懸殊，內鬥不斷，有啲人可以有錢到要整火箭飛去火星，窮嘅連飯都冇得食，搶劫同槍擊成為日常，坦白講，美國已經唔係幾十年前人們認識嘅美國，而係一個金玉其外，敗絮其中嘅國家。

當我哋都認定青年係社會未來棟樑時，美國嘅下一代，正在面對不可知、冇信心嘅未來，美國政府仲喺度搞搞震，搞亂國際關係，不如關顧下自己嘅青年仲好啦。美國崩壞，唔係因為其他國家挑戰，係因為自己內政、教育不濟呢！