來論｜民主黨參選區會　唔係想人送提名呀？

稀思路/筆是機場

除咗臨近區議會選舉，基本上近期嘅政界都係平穩同平靜，同黑暴運動時嘅劍拔弩張，形成好大對比；但政圈不會一日無事，總有一些茶杯裏的風波，或者有一啲人喺度製造事端，由於近期民主黨有意派出代表參選，但外界對其「黑暴背景」有啲抗拒，所以就出現咗到底民主黨會唔會攞到地區三會提名嘅問題。其實，筆者唔覺得係大問題，因為要說服三會成員繼而攞提名，係民主黨成員包括其主席羅健熙嘅問題，將個波交畀建制派，問建制派「民主黨點攞提名」，呢個係咩玩法呢？

兩日前即10月1日喺國慶74周年，唔知點解有個別傳媒，非常關心「民主派」（民主黨）攞唔攞到提名，其中全國港澳研究會副會長、民建聯前主席譚耀宗就成為其中一個追訪對象，譚耀宗指出，三會成員大多數係資深嘅地區服務人士，相信要聯絡佢哋唔難，又表明區議會選舉公平、公正、開放，只要符合資格即可參選，爭取提名要靠參選人處理。

同樣嘅問題，工聯會會長吳秋北同民建聯副主席陳勇亦被問到，吳秋北講得非常直白，話三會名單係公開嘅，只要有心，相信唔會接觸唔到，指出「接觸不到是一種藉口或想要表達一種情緒」；而陳勇就直接分享自己嘅選舉經驗，表示自己四圍地求提名，去人哋會所、人哋開會嘅地方等「求票」，講到明冇人可以「躺平或躺贏、坐着等人上門」。

譚耀宗、吳秋北以至陳勇，喺政圈都相當有份量，筆者嘗試用自己嘅理解去演繹佢哋想法，就係有人要參選，唔該自己努力去搵提名！立法會選舉後，或者完善後的區議會選舉後，要攞足夠提名，關鍵唔係放風同人講驚自己攞唔到提名，而係應該要踏踏實實，懷着謙卑的心，去搵相關人士例如選委或三會成員去攞提名。一啲傳媒嘅作風，可能係意指三會成員們會對民主黨閂閘，但民主黨自己要參選，好應該靠自己去爭取提名，至少到目前呢一刻，筆者未喺公開渠道睇到民主黨「有努力」。

民主黨嘅疑慮，或者一啲傳媒嘅關注點，可能落喺三會成員畀唔畀提名一事上，但筆者講過好多次，筆者睇事物，會睇事情嘅本質，民主黨求提名、求入閘，佢哋未必係驚接觸唔到啲三會成員，而係自己根本都無面目去搵啲三會成員攞提名，點解？因為非法「佔中」，民主黨有份參與；2019年嘅黑暴運動，民主黨根本就係黑暴分子，佢哋唔係搵唔到三會成員，而係到目前為止，佢哋都講唔通自己點解係愛國者，點解唔係破壞分子。

所以，民主黨想攞提名參選，問題唔止係接觸三會成員嘅問題，而係佢哋罪孽深重，好難解釋到畀人聽，佢哋如何愛國，如何支持「一國兩制」，如何係社會嘅穩定力量。在筆者角度，羅健熙等人想參選又唔認自己有錯，又唔承認以往嘅行動傷害市民，咁點說服三會成員提名？有啲嘢，係唔可以當粉筆字抹咗去就算呢！