稀思路/筆是機場
一啲由外國大學或者研究組織發表嘅報告，通常有一個特點，就係關於中國政治、國安以至法治問題，都會給予唔好甚至失實嘅評價，佢哋之所以咁做，係因為咁樣先至符合西方國家嘅主旋律；所以，最近加拿大智庫菲沙研究所（Fraser Institute）新公布嘅《世界經濟自由度2023年度報告》都係呢個道理，唔理香港經濟自由度有幾高，要搵位砌香港，一定搵到，反正西方國家就係用呢種方式去表達政治想法。
過去幾十年，講到經濟自由度，基本上香港都係全球第一，無他嘅，自由嘅市場、透明嘅法制加上政府極少干預，都令香港配得上全球最自由經濟體嘅名銜；不過，今次情況就有啲唔一樣，菲沙研究所嘅報告聲稱香港司法獨立受損、有軍事干預法治加劇，甚至稱限制僱用外地勞工，導致「司法制度」及「規管」分項評分下跌。菲沙研究所咁講，讀者信唔信？
唔係話筆者包拗頸，但菲沙研究所嘅判斷，確實係一種嚴重嘅錯判，講香港嘅司法獨立，由1997年回歸至今，基本上都係冇改變過，如果國際社會近日有留意喺香港法院作出嘅判決，其實行政機構即係政府，一樣會入稟而被法庭拒絕；好簡單嘅想法，如果司法受到控制、非獨立，政府會入稟受阻、畀法庭拒絕咩？
至於「軍事干預法治」嘅說法，更加係無稽之談，自香港回歸以來，法治就係香港嘅基石，筆者見過唔少黃絲為咗政治而抹黑法治，亦睇過暴徒去法院進行破壞，但係話「軍事干預法治」，呢個現象真係未見過；如硬係要話「軍事干預法治」，而「軍事干預」係量度軍事勢力干預政治嘅程度，咁香港最大嘅威脅，就係源自外國勢力不斷嘅干預，包括佢哋支持非法「佔中」、支援黑暴運動，以至之後收留暴徒、示威者或者黃絲。
其實，只要睇清楚菲沙研究所嘅說法，就會知道所謂影響香港評分嘅因素，尤其係降低評分嘅部分，完全係超錯，又例如話限制僱用外地勞工，其實特區政府正在做嘅，係放寬緊外勞來港，點會反而成為扣分嘅問題呢？如果讀者有更好嘅大局觀，可以將菲沙研究所以至英國政府嘅新一份《香港半年報告》一併睇，讀者會發現，香港最引以為傲嘅優勢，就係法治、營商環境以至社會安全，但呢啲優勢，就成為外國勢力、機構用嚟抹黑香港嘅切入點，點解會咁？因為外國勢力唔想香港好，有香港國安法，佢哋就抹黑香港國安法；有獨立判案嘅法庭，佢哋就話司法獨立出問題，講到底，係顛倒是非黑白，借香港搞中國先係重點呢！
收藏
取消收藏
分享
