【點新聞報道】在內地錄得4億人民幣票房《我愛你！》，演員梁家輝、葉童及何珮瑜昨晚（1日）出席電影慈善首映禮，場面熱鬧。
剛榮升外父的家輝心情大好。當談到文藝片於內地錄得約4億人民幣票房，他和葉童都開心不已。家輝更笑說：「基本上咁嘅片種，有咁嘅票房同口碑，係好值得高興嘅，希望香港觀眾都入場睇吓，吸收裏面嘅訊息。」家輝於戲中「扮老」演出，他卻笑指自己「根本就老」，而葉童角色患有認知障礙，她表示：「真係好大嘅挑戰，呢套戲我豁咗出去，預告片內大家都會睇到我啲妝同戲，與以前好唔一樣，我拋開晒啲美麗嘅包袱，演完感覺好自由，演戲應該要係咁。（網民讚妳白頭髮好型。）所以有時唔刻意去做，反而仲有效果。（啱啱結婚周年紀念？ ）日日都紀念㗎啦，哈哈！普通食吓飯啫。」記者恭喜家輝早前嫁女，他突然自爆：「就嚟Double嘞！細女靜曦都就快（嫁），不過唔方便透露幾時。（今年內？）盡快啦。（想快啲抱孫？）希望啦，趁我仲有心有力，可以幫手湊。（好開心喎。）咁我個人不嬲都好開心嘅。」他又打趣自己已很少拍戲，所以「食蕉皮」：「有得接戲緊係接多啲，但暫時工作就係打住家工，三陪唔少得。（喺屋企幫手拖地同煮飯？ ）乜都做吓啦，話明住家工梗係一腳踢。」
葉童則透露稍後會到上海演出舞台劇。已移居北京數年的藝人何珮瑜（Jeana），宣布已回港半年。原來早前她於內地參加槍械訓練營，主要是為即將開鏡的兩套電影及一套劇集做好準備：「我今次一石三鳥，3套作品都有動作場面，我不約而同都係演執法人員。開工需要揸槍，啲槍又好重，所以要練好啲肌肉，驚拍嘅時候會冇力嘛。訓練營每日由朝早10點練到下午5點，連續10日上堂。」
（點新聞特約記者陳惠芳報道）
更多閱讀：
收藏
取消收藏
分享
稿件由上傳 · 文責自負 · 不代表本網立場
