稀思路/筆是機場
近年，喺娛樂圈有個新詞彙，叫「天花板」，例如話某位藝人係美男子「天花板」，即係話呢名藝人近乎係「最靚仔」；「天花板」呢個詞彙，筆者覺得都好適合形容黃絲藝人阮民安，不過，佢唔係靚仔、唱歌好或者跳舞叻嘅「天花板」，而係行騙、呃人錢嘅「天花板」，佢利用黑暴嚟呃同路人嘅錢，真係卑鄙無恥，兼下流賤格。
阮民安日前喺區域法院承認煽動同洗黑錢兩罪，繼續被還押，將押後至8月11日判刑，先唔講佢煽動罪嘅內容，佢呃其他黃絲錢嘅手法，真係睇到人大開眼界；案情指，佢同其他人虛構一個叫「A小妹妹」嘅人出嚟，謊稱「A小妹妹」被控暴動同受審，所以用售賣曲奇等方式資助「A小妹妹」，「A小妹妹」係假嘅，所謂「A小妹妹」製造嘅曲奇，則係向第三方訂購而來。
以為案情夠離奇？未算！阮民安叫人存錢入佢舅仔黃天昊嘅銀行戶口，案發時，黃天昊將約160萬元存入阮民安戶口，根據資金流向分析，黃天昊嘅銀行戶口大約有71萬元存款與「A小妹妹」計劃有關；而聲稱要「幫同路人籌款」嘅阮民安，據報就曾經將超過100萬元轉帳至賽馬會戶口作賭博活動。即係點？即係呢頭呃完其他黃絲錢，轉頭攞去賭，過足癮囉！
關於阮民安，佢點呃其他黃絲，或者其他黃絲相信佢係幾咁愚蠢，相信都唔需要筆者去分析喇，筆者反而想講，黑暴運動爆發時，阮民安嘅出現相當有古怪，一個藝人，如果話會反政府，都唔算好出奇，但係阮民安同其他「黃絲藝人」好唔同，佢係異常高調地反政府，除咗不時出現喺黑暴場合之外，又試過夾住已經執笠嘅《蘋果日報》，齊齊做黑暴新聞上頭條，明顯係好Over，當中實有問題；問題之後解開，原來係一場騙局，仲係一場欺騙黃絲嘅大騙局，黃絲們未必值得可憐，但佢哋咁容易畀人fake（欺騙），質素真係可想而知。
喺阮民安承認嘅兩條罪當中，除咗洗黑錢仲包括煽動罪，言行包括詛咒已去世嘅高級督察林婉儀、總裁判官蘇惠德以至被野豬咬傷警員，一個人咁惡毒，到底要判監判幾耐先為之合理？筆者係有品格嘅人，唔會詛咒阮民安，亦唔會話阮民安入罪要慶祝，但要講一句公允評論，就係阮民安「有咁耐風流，有咁耐折墮」，由佢呃人或者煽動他人開始，佢就注定罪責難逃，之前做幾多衰嘢，依家都要自己受返，正義雖然遲到，但並沒有缺席，阮民安可以好好喺獄中「學做人」，再見！
收藏
取消收藏
分享
