來論｜民調指英國人反華？全部都被洗腦吧！

稀思路/筆是機場

西方社會存在一個迷思，或者應該話係一種謬誤，就係以為中國崛起會威脅到佢哋，或者覺得強大嘅中國對世界唔好；呢一種思想近年喺西方國家植根，帶起呢股歪風嘅，係以選票、政治利益先行嘅政客，然後亦有唔少西方媒體喺度推波助瀾。最近，英國有個民調，聲稱有74%受訪市民唔相信中國，而且有39%人認為中國崛起係威脅；面對呢個或者相關嘅民調結果，筆者覺得「毫不驚訝」，因為英國人睇嘅、聽嘅，都係政客或者傳媒對中國嘅抹黑，得出咁嘅結果，其實係英國政客同傳媒洗腦嘅結果！

負責今次民調嘅外國智庫，唔需要分析佢嘅調查方法或者深究呢個組織，喺英國進行嘅一個民調，其實結果大家都心中有數，事實係，相關智庫嘅研究員，之前先試過撰文講西方外交抵制2022年北京冬奧，內容又有抹黑中國嘅成分，一個咁嘅智庫，做一個關於英國外交政策以至全球事務嘅年度調查，針對中國以至俄羅斯，都係意料之內。

但為咗進一步了解呢個調查，筆者帶住一顆好奇心去睇份報告全文，發現入面有個章節，直譯叫「潛在入侵台灣」（Potential Invasion of Taiwan），其中提到關於中國會否「入侵台灣」；不論英國市民點睇，呢個調查嘅前提係錯到離晒譜，台灣地區，本身就係中國一部分，唔存在入侵與否的問題，呢個智庫問「一個國家會唔會入侵自己地區」，反映佢哋嘅國際觀錯到離晒譜，甚至係喺度誤導緊受訪者，等人給予一個「點都錯」嘅答案。

筆者覺得，相關智庫嘅調查，同西方國家近年嘅取態一脈相承，但呢種極有偏見嘅調查，絕對可能會帶錯風向，例如中國崛起係和平崛起，絕對樂意亦可以同其他國家合作共贏，面對一個正在狀大而有益於世界發展嘅國家，英國政客以至智庫想玩「封閉」、「閂閘」，咁對於英國發展嚟講唔係好事，因為佢哋部分人正在拒絕嘅，係前所未有嘅機遇。更深嘅層次，係英國自己都千瘡百孔，竟然仲想玩針對同抹黑，如果英國同中國減少合作，係佢自己繼脫歐後，進一步脫離世界，脫離健康有序嘅國際關係。

基於歷史原因，可能英國仲以為自己高高在上，又或者基於英國曾經管治過香港，所以英國政府以為自己仲可以插手香港事務；但事實係，英國已經唔係統治四分一個世界嘅國家，香港嘅事亦已經唔關英國事，所以當有部分受訪者支持英國政府嘅BNO計劃時，其實亦係受到誤導所致。不過，喺三個移民計劃中，BNO計劃係最少人支持，點解咁？可能因為，喺部分英國人當中，其實都未必咁歡迎香港移民，果啲自我感覺良好嘅移英黃絲，會唔會有日被英國政府同英國人嫌棄，係未知之數。