【點新聞報道】無綫《靈戲逼人》將於明晚（3日）播映，曾強調自己熱愛唱歌的張振朗，是次為劇集獻唱插曲《似夢迷離》，並夥拍《聲夢》首屆畢業生潘靜文（Sherman）合唱，獲讚「中年好聲音」之餘，更被指與知名音樂人Johnny Yim「撞頭」，另有網民搞笑「召喚」龔嘉欣加入獻聲：「佢唱過《愛情故事》（《香港愛情故事》插曲）唔差。」
劇集的新生代演員，包括阮浩棕、劉穎鏇和吳子冲，三人共同創立粵劇戲班追夢。阮浩棕為了突出角色熱血及年青感，事前特意操大隻及曬黑。劇中會擔任文武生的浩棕將大晒粵劇功架，他受訪時透露有特意上堂學習粵劇基本功，並坦言是一大挑戰：「慶幸現場有心姐（謝雪心）可以請教，劇組亦有找來一位文武生到現場幫忙指導。好記得其中一場大戲場口，呢位文武生讚我有天分演到大戲嘅味道，嗰刻都幾有成功感！」浩棕今次再與劉穎鏇飾演一對，浩棕笑言：「最初覺得佢唔係好講嘢有啲高冷，後來發現原來只係佢怕凍，喺廠入面凍到唔願出聲！」
劉穎鏇飾演二幫花旦兼動作替身演員，坦言事前從未接觸過粵劇：「從來冇想像過自己會演粵劇，事前都有專誠搵唱開大戲嘅Auntie請教唱粵劇腔同埋造手，現場亦有師傅指導同調整我嘅動作，希望盡量模仿到個神韻。」穎鏇又大呼化粵劇妝有新鮮感：「每次整頭加化妝都起碼要兩個鐘，唔單止化妝好特別，就連黐頭髮都好得意，會用一啲植物去整到個假髮好黏。其實落妝都唔太難，但要慢慢咁捽走啲色。」
（點新聞特約記者陳惠芳報道）
相關報道：
收藏
取消收藏
分享
