【點新聞報道】電影《別叫我「賭神」》正式上畫，周潤發（發哥）四出宣傳，昨晚（7月1日）亮相谷德昭主持的《爆谷一周》。發哥在該片中以跑步改變自己，而現實中發哥以跑步改善個人健康。
發哥說：「我拍《賭神》那張相時，大家見有少少寒背，其實係真。這是以前去太多動作片，累積的舊患所致，又叫『駱駝病』，然後就靠跑步改善情況。」他除了改善自己外，發哥還嘗試改變身邊人。
谷德昭提及當年張達明大病後，便一直收埋自己，個個朋友叫他都不願出去，直至發哥出聲他不好意思推卻，更自動自覺5、6點起身跟發哥跑步。發哥說：「我見佢做完電療，成條頸黑晒，咁唔得，所以就叫佢一齊跑步，而家我唔跑佢都自己跑，跑完仲WhatsApp我話『今日交咗功課』。我會畀加油公仔佢。」
另外一位受惠的是「鵬哥」盧海鵬。由於他自己一個人住，生活枯燥，於是發哥便邀請他一齊跑：「最初接佢去跑，連遞隻腳上車都遞唔到，到而家一齊跑完又去食嘢，幾開心。」發哥更笑言：「有睇相佬話鵬哥只可活到79歲，所以我帶佢跑步跑到80歲就無理佢。」
現場有觀眾問到發哥在電影被兒子影響，改變一生積極生活，問到現實中可有人影響他這麼大？發哥二話不說︰「我阿媽，我阿媽永不言敗，同埋勤力到不得了，係一個好好的榜樣，佢話我知細個時去耕田，會孭我出去放在田附近，全日就咁不停曬，所以點解我咁黑，原裝膚色。」
雖然發媽沒讀過書，但發哥形容她智慧好高：「講嘢好識押韻，仲押韻過盧海鵬，佢去賣菜可以出口成文——『太平山頂有隻鳳凰雞 海珠橋下有高低 三分利錢唔過太 斬低枱腳就枱圍 斬低價錢就下熟客仔 埋嚟睇埋嚟揀』。佢係最早識講『埋嚟睇埋嚟揀』呢句拉客，好厲害，我當年已經聽到呆咗，唔識字可以講到咁叻。」
（點新聞特約記者陳惠芳報道）
收藏
取消收藏
分享
