【點新聞報道】一連11場「Revisit張敬軒演唱會」於昨晚（17日）舉行尾場演出，軒仔這晚放盡演出，更四度Encore，唱至晚上12點才完場。
昨晚演唱會是今年初1月2日3點半的補場，軒仔說：「好多謝你哋嘅耐性同對我嘅信任，揸住呢張門票咁耐，今晚係我哋『Revisit』呢個演唱會補場嘅最後一個晚上，好多謝大家支持。」
軒仔又自嘲與舞蹈員組成跳唱組合「中彈老年團」,邊唱邊跳不輸韓團的台風。但軒仔笑言，自己一把年紀還在挑戰觀眾的底線，他更說：「其實過咗今晚，喺過去嘅3年入面，今晚係我哋第51場嘅演出。我冇諗過，喺短短3年時間，我可以喺呢個城市當中有咁多支持。」
軒仔另外又多謝fans以不同形式作應援，他說：「過去呢3年，因為疫情，對於我哋各自嘅經濟上面都有一定嘅衝擊，喺呢個年頭，大家留多個錢傍身，同埋大家湊到我咁高咁大，我覺得有啲嘢應該我自己做返，所以由今個月開始，我嘅歌迷會HCFC會由我私人撥一筆應援基金出嚟，如果你想做一啲應援物品，唔好你出錢，我出錢。我唔想大家使錢，所以大家申請我哋嘅基金，咁我就好開心，可以得到大家應援。」
去到Encore環節，軒仔唱過《病況》後，特別感謝Tyson Yoshi，事緣在軒仔中了新冠期間，Tyson Yoshi特別關心他的病況。軒仔道：「呢個好似細佬一樣嘅物體，一個好有心嘅男人，多謝你，我要當住Christy（Tyson女友）面講I Love You。」軒仔又為自己過去20年歌唱事業作最後總結，說：「過咗今晚最後一場嘅『Revisit』，我呢個20周年俾自己嘅旅程，就算係暫時畫上一個句號，無論今晚嘅觀眾，無論之前有冇去到紅館The Next 20嘅演唱會，多謝大家陪我行呢條路，對於我嚟講，從而家開始，呢個係新嘅開始，一個新嘅20年，希望我同大家一齊進步，多謝大家。」然後軒仔送上最後歌曲《遇見神》，就曲終人散圓滿結束。
（點新聞特約記者陳惠芳報道）
收藏
取消收藏
分享
