移民圈每隔一段時間便有笑料流出，最新一則是有移民英國港人在網上搵麻雀腳，仲講到明要用真金白銀，結果被網民留言勸告，其行為可能構成公然招賭，分分鐘會被遣返，事主即時笠水刪帖文。
該名移英港人早前在社交平台的移民群組發英雄帖，「偷敦有冇老人家平日有興趣打牌？三番起糊，打錢，請PM」咁話。麻雀腳就唔知搵唔到，但有網民質疑樓主搞賭檔，亦有人留言話：「你公然招賭，其實好大罪，如果有人輸咗，告發你，你實會被遣返，以後都唔使入境」。隨後，事主已刪去有關帖文。
收藏
取消收藏
分享
