稀思路/筆是機場
如果大家有玩過「三國殺」，應該會記得有張錦囊牌叫「無中生有」，即係「無中生有」地摸多兩張牌，喺現實生活中，有啲組織都好鍾意用「無中生有」嘅方式去老屈人，有啲手段高明啲，屈咗人都唔容易踢爆，有啲手段就低劣啲，呢頭屈完人，轉頭就畀人踢爆，非常樣衰；好似國際特赦組織咁，幾日前仲聲大大，聲稱有名維吾爾學生抵達香港機場後被內地公安問話仲「失蹤」，但係兩三日前，就「更正」話個學生已經聯絡佢哋，佢根本就無去到香港。成件事清清楚楚，就係國際特赦組織擺明老屈，請問國際特赦組織，抺黑完人，唔需要道歉嘅咩？
睇返國際特赦組織嘅說法，真係十分可笑，佢稱對「涉事學生」安全感到高興，又話會繼續支持疑被侵犯人權嘅人或其親友嘅求助，又指會「繼續監察及紀錄維吾爾人在中國內外的人權狀況」，以及香港因為香港國安法後「倒退」嘅人權狀況；佢哋嘅表述，擺明喺度自High（情緒莫明嘅高漲），屈完人，扮無事，扮正義，仲要話會繼續監察人權狀況，大哥，你哋依家係幻想有人嘅人權被剝削，然後抹黑中國先真喎！
當國際特赦組織話有人喺香港機場失蹤時，除咗唔會Fact Check嘅西方媒體信到十足之餘，有啲自以為好醒嘅網民，話相關學生喺香港機場被「捉走」，特區政府梗係無佢入境紀錄，幫國際特赦組織「說好抹黑故事」；其實唔需要太多證據，我哋都好容易知道件事非常不可信，筆者想問下各位讀者，去過香港機場咁多次，幾時會見過公安喺香港機場，或者聽過公安喺香港機場「執法」？國際特赦組織嘅創作力量同幻想，真係嚇人一跳！
因為國際特赦組織嘅抹黑過於嚴重，特區政府就發表聲明，斥責國際特赦組織無就其無中生有、惡意抹黑特區政府嘅可恥不實言論作出道歉，並表示憤慨與不滿。全國政協副主席梁振英亦有喺Facebook發文，請國際特赦組織交代全部實情，並向「涉事學生」、香港特別行政區政府和中國政府道歉。筆者估計，國際特赦組織極有可能將事件輕輕帶過，唔會向特區政府道歉，但我哋要睇清楚呢啲所謂國際組織，佢哋都係以正義、公義之名，其實做咁多嘢，都係想針對同抹黑中國。
維基百科介紹，「國際特赦組織，是一個國際非政府組織，總部位於英國倫敦，致力於推動全球人權事業的發展，在全球擁有大約七百萬成員及支持者。該組織的工作方針是對人權狀況進行調研，採取相應行動，尋求終結各種侵犯人權的行為，並且為那些遭受迫害的人們伸張正義」，睇呢段由維基百科綜合嘅介紹，再睇下國際特赦組織做嘅「好事」，真係會忍唔住笑，國際特赦組織擺明屈人、陷害人，佢哋識就人權狀況做調研咩？要為受到迫害嘅人伸張正義，敢問一問，其身不正，何以正人？何以伸張正義？如果做錯事，冤枉咗人連一句道歉都無，唔好講咩假大空理念，佢哋以前、以後所做所講嘅一切，各位讀者要先問佢哋一句，「真的嗎？證據呢？」
收藏
取消收藏
分享
