來論｜空服歧視內地客　不解僱難道要「嘉獎」嗎？

稀思路/筆是機場

以下係一個情境題：

幾名空姐，喺飛機執勤期間，包括喺對話時，恥笑外國旅客唔識廣東話或普通話；有外國人由於喺香港生活過，所以聽得明佢哋講咩，之後投訴以及喺Facebook發帖，引嚟極大迴響，大家估下網民會有咩反應？

以少部分香港人尤其係黃絲崇洋媚外嘅心理，會話呢啲人搞衰香港個名，令香港形象受損，咁問題就嚟喇，如果歧視其他種族嘅人係要譴責，有空中服務員擺明歧視內地乘客，又點可以唔罰呢？

相信唔需要筆者多講解，大家都會知道，筆者講緊嘅係一單發生喺國泰航機嘅事情，有國泰乘客喺「小紅書」發帖，有空中服務員對話時歧視內地乘客，取笑乘客以英語索取毛氈時將「blanket」講成「carpet（地氈）」，仲有人用廣東話廣播勸乘客返回座位後，向其他同事形容乘客「聽不懂人話」，事情十分清楚，就係有空中服務員擺明歧視、矮化甚至侮辱乘客，國泰管理層決定解僱相關人士，筆者認為完全正確，算係伸張正義。

喺網上，一啲人以唔同理由為涉事空中服務員狡辯，包括話佢哋只係傾偈，或者指投訴乘客「玻璃心」，筆者咁睇，如果有人喺私人地方傾偈，無外人喺度，呢種狡辯可能仲勉強講得通，但係涉事空中服務員果時喺飛機執勤，嗰度係一個工作場所，亦係一個公開地方，無可能因為「佢哋自己傾偈」就當無事。至於質疑投訴乘客「玻璃心」，好老實講，呢件事唔係涉及投訴者有「咩心」，而係有人擺明玩歧視，係一個是非題，如果歧視係冇問題，香港唔需要有平機會，大家亦唔好講咩平等喇！

國泰今次嘅處理手法，總體而言係啱嘅，有空中服務員公然歧視內地乘客，公司應該採取果斷措施，但筆者諗問題諗得複雜啲，點解其他航空公司無出現嘅情況，會出現喺國泰身上？筆者先唔講佢係英資、成日服務外國人呢啲業務問題，一班空中服務員敢喺飛機攞內地乘客嚟諷刺、歧視，可能係代表咗部分員工嘅立場同心態，國泰管理層需要做嘅，仲包括要教導好員工，所有語言、種族嘅乘客都要尊重，而且講英語嘅乘客，絕對唔係高人一等！

睇返呢單新聞，有空中服務員笑稱If you cannot say blanket in English, you cannot have it（如你不能以英語說出毛氈，就不能取得它），一副睇唔起人嘅口氣，喺香港唔少人都鍾意間唔中講幾句英文以表現得自己「叻」啲，呢種觀念根本就係有問題，至少筆者唔覺得講英文嘅人係高貴啲；筆者反而諗，依家內地同香港交往頻密，唔識講普通話更唔方便。

最後，國泰有空中服務員咁鍾意講英文，筆者都送佢哋一句，If you don't respect passengers, you cannot be a flight attendant（如你不懂尊重乘客，就不能成為空中服務員）。