稀思路/筆是機場
今日同大家介紹一個近年啲人好鍾意用嘅潮語，叫「GG」，「GG」嘅全寫係「Game Over」，即係「完蛋」、「玩完」咁解。「GG」嘅應用好廣泛，例如一個人被公司炒魷，可以話佢「GG」了；國家越搞越差，經濟差勁、人心不穩，都可以話呢啲國家可以「GG」了。個別國家管理唔好，一啲都唔出奇，但如果一個由發展國家組成嘅政治聯盟都搞唔掂，仲想主宰世界，咁就真係「GG」了！講緊邊個政治聯盟或者論壇？咪係又喺度對中國指手畫腳嘅G7（七國集團）囉！
每逢有西方國家聯盟等「聚埋一齊」，大家都可以諗到，基本上都係無乜好嘢，日前G7嘅七國領袖發表聯合聲明，除咗聲稱我哋國家對其他國家同地區「經濟脅迫」外，又借台灣地區、新疆同埋香港喺度搞風搞雨；我國外交部就嚴肅地回應，「G7不顧中方嚴重關切，執意操弄涉華議題、抹黑攻擊中國、粗暴干涉中國內政」。
為咗了解西方媒體點報道事件，筆者又特登睇下啲外媒點報呢單嘢，例如某間英國大媒體，就好「西方視角」地報道件事，話G7嘅「廣島願景」聯合文件，稱「中國發展核武缺乏透明」、「表達對台海和平穩定及新疆，香港人權事務的關注」...佢嘅標題又相當架勢，寫住「聯合聲明劍指中國『經濟脅迫』」；筆者真係想問下，對台海穩定造成影響或者玩「經濟脅迫」嘅，唔係美國咩？
睇呢啲國際新聞，有時如果頭腦唔清醒，好容易會墮入西方陷阱，以為佢哋講乜都啱，好彩筆者唔係呢種人，睇外媒報道或者G7嘅聲明，其實同香港嘅攬炒派一樣，都係一個「屈」字，例如講到核武，唔係得我哋國家有；講台灣地區或者香港問題，一直借機台灣地區或者香港特區搞亂中國嘅，就係美國、英國呢啲國家。至於「經濟脅迫」，更加係得啖笑，邊個國家利用所謂經濟制裁去打擊人？邊個國家將美元「武器化」？嗰個咪係佢哋老大哥美國囉，G7聲明，就係將西方國家嘅霸權行為，話係中國做嘅，公平咩？
回到「GG」嘅問題，G7呢個七國集團，當中無一個會成員國領袖民望超過50%，美國總統拜登無，加拿大總理杜魯多無，英國首相蘇納克都無，拜登民望仲叫有4X%，杜魯多同蘇納克？分別得39%同33%，一班喺自己國家都唔太受歡迎嘅領袖，仲好意思圍埋開會抹黑中國，會唔會有少少唔怕醜？咁樣對內對外都樹敵，呢種西方聯盟遲早「GG」！
之前睇評論文章，有分析就話G7峰會選擇喺廣島進行別具意義，幾十年前原子彈就落在廣島等等，其實當年嘅戰爭，正正係由一啲野心家所挑起，當日嘅野心家，有國家係今日嘅G7成員國，亦有G7成員國已經成為世界「第一霸權」；如果呢啲國家嘅領袖真係反對戰爭、侵略以至係經濟脅迫，唔該佢哋睇下自己嘅所作為所為。「民主國家」唔係大晒，當G7成員國無個領袖受自己人民歡迎嘅時候，佢哋要做嘅唔係去干預其他國家，而係要做好自己，做應做（ought to）的事。
收藏
取消收藏
分享
