【點新聞報道】馬時亨主持綜藝節目《馬時亨 香港情》，明晚（13日）一集主題是「電影」，他邀來偶像梁家輝擔任嘉賓。
無所不談的家輝笑指自己是在現已結業的樂聲戲院長大：「我媽媽當年係樂聲戲院嘅接線生，我諗我滿咗月就喺嗰度大，到八歲都係喺戲院入面，間戲院我摸熟曬。」家輝續指當年在戲院中待得最多的地方竟然是女廁：「我成日畀人擺喺女廁，因為有女廁先有阿姨，又有張枱仔，咁我就畀人擺落個籃度。」
家輝又謂由於當年姨媽在同一戲院賣爆谷，故此除了定時定刻會被安排放於門口的爆谷機方便姨媽照顧外，亦因利成便食住爆谷大：「以前賣爆谷要同戲院分，每日戲院畀啲紙袋你，賣咗幾多紙袋係要返去同戲院分賬；咁我新鮮嘅冇得食，都係食嗰啲跌落底板嘅爆谷，我每日就揸住咁大包爆谷喺機底度係咁筆，就係咁食到八歲。」家輝另外還分享了小時候「暢遊」戲院畫房趣事，馬時亨聽畢忍不住笑言：「整定你入呢行！」
自小已與電影圈結緣的家輝，還在節目中兼任「主持」暢談電影史。家輝透露曾經盛極一時的「午夜場」，是當年用來「試水溫」的方法之一，電影人憑藉午夜場次地下的蔗渣數量以及爛櫈數目，便能預測一套電影是否受歡迎。是次家輝現身，除了令粉絲馬時亨大感雀躍，全個製作組亦是興奮莫名，瘋狂集郵之餘，更大讚家輝親和力逼人。
（點新聞特約記者陳惠芳報道）
收藏
取消收藏
分享
稿件由上傳 · 文責自負 · 不代表本網立場
