向司機大佬致敬！有網友分享一件超級好人好事，指日前與舊同事帶着數名來自不同兒童院舍的小朋友去迪士尼玩，晚上搭的士回院舍時，由於其中一位小朋友有幸被領養將離港，大家都好好珍惜餘下的相處時光，可能對話太感動或煽情，到達目的地時，司機竟不肯收取車費，「堅持係咁要我哋留返啲錢請小朋友食飯同繼續帶佢去玩」，令她大受感動，特意記下司機的車牌，發文表揚及道謝。帖文引來網民留言大讚感動，「人間有情」、「好人好事，值得表揚」。
樓主在fb群組「的士乘客及司機行為分享區」發文表示，她周五（14日）與舊同事帶着多名來自不同兒童院舍的小朋友去迪士尼玩，玩得興高采烈和太夜，離開時要飛奔去搭的士，趕在約定時間返回院舍。由於其中一位小朋友有幸被領養，將會離開香港，「所以我哋叫小朋友好好珍惜最後的士呢段時間，傾吓計，互相望吓對方，因為今日一別唔知幾時可以再見」。
樓主憶述，搭的士期間，由於要保持小朋友清醒不睡着，所以不斷與他們傾偈，「唔知我哋嘅對話係唔係太感動，或者太煽情，當我哋去到終站，要畀錢嘅時候，大哥唔肯收我哋嘅車費，堅持係咁要我哋留返啲錢請小朋友食飯同繼續帶佢去玩」。雖然樓主堅決說不用，但因趕時間，最後都冇再繼續拉扯，便帶小朋友衝了下車，但就記下了的士車牌。
樓主日前特意加入群組發文感謝司機大哥，形容對方戴眼鏡、臉留鬍鬚、身形「大大隻隻」，指「因為知道喺迪士尼排隊做生意嘅的士應該排咗好耐，我哋有兩個站，路程好遙遠，仲要肯過海，其實車費唔平，我哋唔想司機用咗咁多時間白做生意，但係我哋又畀唔返錢佢」，故希望若有人知道是哪位司機，「麻煩都幫手同佢講聲多謝」。
收藏
取消收藏
分享
稿件由上傳 · 文責自負 · 不代表本網立場
