稀思路/筆是機場
攬炒派、黃絲、黃色經濟圈，喺黑暴運動時期形成，但一個以攬炒政府為己任嘅圈子，隨住攬炒派沒落，走嘅走、被捕嘅被捕、坐監嘅坐監，再講咩黃色經濟圈，除咗不合時宜之外，其實都已經無咩號召力；所以，如果有人同黃色經濟圈割席，絕對係明知之舉。最近，非法「初選」案認罪被告林景楠喺社交平台公開與黃色經濟圈割席，黃人鬧佢，建制派支持者亦鬧佢，筆者反而覺得，既然林景楠公開同黃色經濟圈割席，我哋應該支持佢，支持更多人棄暗投明，為香港由治及興，作出一分貢獻！
睇林景楠嘅Facebook發帖，其實都講得幾絕下，劈頭第一句，就大字標題寫住「香港不能亂，也亂不起」，之後就寫「黃色經濟圈就是一個錯誤的示範，阿布泰在此聲明與黃色經濟圈不再有任何關係」、「香港由治及興﹐阿布泰接著的日子，會繼續服務香港，說好香港故事，為香港，為國家出一份力」，然後署名「阿布泰創辦人林景楠」。
呢段說話，果然喺黃絲之間引發熱烈討論，喺林景楠嘅發帖下，就不斷有人批評佢，包括話「唔係你放棄香港人 宜家係香港人放棄你」、「多謝你俾我哋睇清楚你嘅真面目」、「完美示範何為出賣同背叛，睇準時機騙取良心正義真香港人支持錢財。。。」、「等睇你全線結業」，再難聽啲說話都仲有，但筆者就唔一一引述喇，依家一班黃絲嘅心態，就好似情侶分手咁，畀人飛嗰個話「依家唔係你飛我，係我飛你」，回應相當肉酸，亦有人覺得自己畀林景楠呃咗，枉自己幫襯咗阿布泰店舖咁耐。其實，人不為己，天誅地滅，當初林景楠以至阿布泰，同黃絲、黃圈因利益而結合，今日因利益而割席，係必然發生嘅事。
換轉喺建制平台，林景楠雖然同黃色經濟圈割席，但建制派支持者其實都唔多支持林景楠，有人更揚言等睇佢間阿布泰結業，依家嘅林景楠，可以話係兩邊不是人。大家有睇開筆者文章，可能都會知道筆者有時諗嘢比較另類，既然依家一個喺攬炒派名氣高嘅前政客棄暗投明，我哋應該畀多啲支持同鼓勵佢，更加要鼓勵其他同黃絲割席嘅人，唔駛怕，即管同黃絲、黃圈割席，畢竟黃色經濟圈係錯誤示範，迷途知返，愛國愛港，先係唯一出路。
關於黃色經濟圈嘅問題，好多人都指出過，其實黃色經濟圈已經無乜前景，一來政治氣氛唔同咗，二來有唔少黃店以「政治掛帥」，但所售貨品、食品以至服務，都同價錢「不成正比」，被劣評嘅黃店比比皆是，再話自己係黃色經濟圈一分子，其實就係拆自己招牌。今日林景楠公開同黃色經濟圈割席，相信係有功利地計算過嘅，我哋用另一個角度諗，如果連「賺盡黃圈錢」嘅林景楠都同黃色經濟圈割席，黃色經濟圈仲有咩前途可言呢？自黑暴運動開始，就有人不斷食住條水「搵食」，今日「名臭咗」、「水又無」，黃色經濟圈都應該步入歷史喇，如果仲有人想借此搵食，呢啲人好可能未瞓醒，仲沉醉於「黑暴夢中」。今日林景楠清醒喇，其他人醒未？
收藏
取消收藏
分享
