稀思路/筆是機場
由非法「佔中」開始，到黑暴運動時到達高峰，香港警察，依法執法，止暴制亂，但就非常不幸地成為咗攬炒派政客、支持者以至暴徒嘅攻擊對象；小則喺網上批評，大則喺街頭襲擊佢哋，甚至有暴徒會衝到紀律部隊宿舍「恐襲」紀律部隊成員嘅屋企，而基於攬炒派「禍必及妻兒」嘅恐怖心理，警察子女被欺凌同起底都特別嚴重。如果要問筆者，筆者絕對支持香港警察，因為如果無咗佢哋，香港都唔知會亂成點；如果市民尤其係黃絲對警察要求咁高，筆者真係想知道，一啲移英黃絲，佢哋係點睇一啲辦案效率低，而且會借機同報案人等進行不恰當性關係或性接觸嘅英國警察呢？
根據英國《觀察家報》揭露，原來自2018年以來，英國英格蘭同威爾斯地區嘅22個警察部隊中，就有近80名警員同罪案受害者、證人或者疑犯，進行不恰當嘅性關係或性接觸，因此仲面對紀律處分；有家暴案嘅受害者表示，自從自己去警局報案，就有負責警員不斷向佢發短訊，又問佢鍾意去邊度做運動，令人不勝其擾，甚至令受害人諗過自殺。睇到呢啲新聞，英國有咁多由香港移居過去嘅黃絲，佢哋係咪應該要快啲走出嚟聲討英國警察？如果唔咁做，最大可能，就係佢哋去到人哋國家，連聲都唔敢聲。
睇返英國警察嘅醜聞，有啲地方大家真係可以細思一下，例如涉案嘅警察部隊，其實只係來自半數英格蘭同威爾斯嘅部隊，即係話今次揭露出嚟嘅數字，可能唔夠一半，亦可能只係冰山一角；另外，就係部分涉事警員被革職或者自己辭職，但仲有部分仍然留職，只係面對較輕嘅處罰，當中係咩原因呢？證據不足？事件輕微？定係外國一直有類似文化？凡此種種，英國警察嘅紀律性，可能好值得大家商榷。
睇公開資料，英國早前就有警員承認喺任職期間，犯下多宗強姦案，上月被判終身監禁；另外，亦有警員喺兩年前綁架、強姦同謀殺女性，呢啲事件，都令人更加關注英國警察嘅惡行。對於英警嘅紀律，唔同人可以有唔同嘅判斷，但筆者想講嘅係，所謂「西式民主國家」，就算係以直接或間接方式選出領導，「民主」絕對唔代表呢個國家「Okay」，因為「西式民主國家」除咗捧到天咁高嘅「一人一票」外，喺好多範疇包括經濟、民生以至治安，其實情況都係慘不忍睹。
同樣係《觀察家報》嘅報道，之前就報道過半數英國警察或警察單位查案水平唔達標，令筆者諗起之前去咗英國嘅攬炒派商人周小龍，將車輛泊喺停車場，車窗被毀，現場員工唔想理，警察都係唔想理，甚至連去現場調查都冇，之後通知佢因為「沒有足夠證據及線索，你的案件調查已終止」；係囉，去英國，隨時遇上盜賊，然後又會遇到「幫你唔到」嘅英國警察，大家話幾「好」呢？當一啲攬炒派政客同支持者抹黑香港警察時，其實服務我哋嘅香港警察，唔單止稱職，更加係完勝一啲唔查案或者不時「打死」疑犯嘅外國警察！
收藏
取消收藏
分享
