稀思路/筆是機場
幾日前，喺旺角嘅「阿布泰國生活百貨」旺角分店，發生咗兩單涉嫌「在公眾地方行為不檢」嘅案件，有人到該店大叫「林景楠同我出嚟」、「篤灰狗」等等，警方日前就拉咗5個人，最細嘅仲只係得14歲，據報其中一人係幾日前指罵導演張婉婷嘅少年。點解一班後生仔，要無啦啦到一間生活百貨店搞事呢？原來一切，又係因為黃圈內鬨，因為攬炒派嘅非法「初選」案」。
如果大家有留意近日都幾受關注嘅非法「初選」案，會留意到其中一名被告，即係「阿布泰國生活百貨」嘅創辦人林景楠，已經由原本唔認罪，到喺案件開審時改為認罪，並且確認會擔任控方證人作供；我哋唔去評論案件案情或者內容，林景楠做得「控方嘅證人」，即係話佢嘅供詞除咗會涉及自己參與案件嘅內容，可能仲會指證到其他被告。由於林景楠已被攬炒派視為「叛徒」，所以就引起「同路人」圍攻，林景楠好可能因為認罪、成為控方證人而減刑，但與此同時，佢創辦嘅百貨店，亦肯定會受到杯葛，好難再食「黃圈水」。
睇返幾名青年去「阿布泰」搞事嘅經過，講真，啲說話都幾難聽，例如一名綽號「勇狗」嘅男子，就喺店內大叫「林景楠同我出嚟！林景楠喺邊度啊？××××篤灰狗，又話好×黃嘅？我條底褲仲黃過你啦！」，然後行出店外，仲要笑住問「係咪坐咗監啊佢？」。另一方面，一向有同「阿布泰」合作嘅商號，亦開始同「阿布泰」終止合作，例如杜汶澤嘅自家架品牌，就表示不再喺「阿布泰」銷售，網上平台「懲罰Mee」宣布下架「阿布泰」，仲講明「同路人應該互相支持，不應向同路人抽刃，如果繼續支持阿布泰，是對堅持原則的同路人二次傷害」。
林景楠或者「阿布泰」事件，同其他黃圈內鬥事件一樣，都係人性嘅表現，就如之前好多市民食住「花生」關注嘅張秀賢「借錢事件簿」一樣，果時張秀賢為嘅係「錢」，今日林景楠為嘅係減少牢獄之苦。黃圈或者攬炒派內部咁嬲，當然係因為佢哋覺得自己畀林景楠出賣咗，尤其係之前曾經去「阿布泰」爆買嘅黃人，原來佢哋當初大力支持嘅「阿布泰」創辦人，變成「二五仔」，所以感覺特別嬲。但掉返轉講，如果唔同嘅人站喺林景楠嘅角度，人要自保，其實都係正常嘅事，如果講到坐監，唔好話以年計，就算只係坐多幾個月，都可能係一件相當痛苦嘅事。
就如之前所有黃圈內鬥事件，無論黃圈人或者攬炒派講嘢係幾咁慷慨激昂都好，最終最終，政治理念、理想或者係「反政府」嘅決心，始終都係敵唔過利益，或者要保護自己嘅心態。有一單嘢筆者印象好深，就係2014年非法「佔中」發生前/時，明明以戴耀廷為首嘅反政府分子，強調自己係「公民抗命」，又話會承擔罪責，點知一被檢控，發現罪狀比想像中嚴重，就有人退縮、唔認罪；情況去到今日，認罪以至轉做控方證人嘅被告，其實喺自身利益前，將黃圈嘅理念或者所謂齊心拋開，真係一啲都唔出奇。
非法「初選」案啱啱開審，就出現有人轉做控方證人、有會議影片呈堂等事情發生，可以肯定嘅係，未來幾十個審訊日，仲會有好多內幕爆出，從法律問題睇，呢啲係被告之間有無或者幾大程度參與犯罪嘅問題；從攬炒派嘅政治角度睇，呢啲就係陣營內有幾團結或者有幾殘酷嘅問題。今日林景楠甚至區諾軒成為咗眾矢之的，隨住審訊一直繼續，相信仲有其他被告或者證人會喺法庭外受到「自己人」圍攻，呢場法庭實戰，可能比近日票房破紀錄嘅《毒舌大狀》更精彩。
收藏
取消收藏
分享
