稀思路/筆是機場

喺黑暴運動之後，香港有啲人選擇移民海外，最熱門地方就係英國，呢啲人要移民嘅「最大理由」，就係因為佢哋認為英國「更自由」，但英國係咪真係咁自由呢？英國當局最近公布《公共秩序法案》修訂，畀警方有更大權力去提前介入破壞性示威活動，有移英港人去信政府要求重新考慮法案入面有爭議嘅部分，喺英國成長嘅前香港刑事檢控專員江樂士就指出，法案修訂令英國國民喺唔同領域嘅個人自由被削減，仲串啲移英港人係into the fire（跌入火坑），筆者真心想知道，依家英國收緊示威限制，嗰啲移英港人，係咪又要「移民」喇？

香港一套示威、遊行同集會嘅法例，某程度上係回歸前已經承襲住英國嗰套，給予香港市民一定自由；而依家英國呢？根據公開資料，英國國會提出嘅《公共秩序法案》（Public Order Bill）修訂方案，方案建議授權警方介入同中止可能導致破壞性影響嘅示威活動，例如堵路、緩慢遊行等等，有人權組織就批評咁係攻擊民眾遊行示威權利，而一啲移英港人等，就認為修訂對香港人喺英國抗議示威權利構成威脅，甚至有意見形容當中嘅啲措施，例如「預防嚴重破壞令」就好似想將行使示威權嘅人困喺「露天監獄」咁，禁止一啲從未犯過罪嘅人示威，令佢哋被逼受到宵禁條件限制，限制佢哋使用網絡嘅方式等等。一句講晒，就係示威遊行等自由將會受到好大嘅限制。

對於英國當局提出修法、收緊示威權利，當唔少人都將焦點放喺法案本身嘅時候，筆者想先講講，法案之所以要修訂，最根本原因，唔係英國想禁止示威或其他，而係英國本身千瘡百孔，通脹搞唔掂，能源價格又搞唔掂，當唔同團體、組織嘅人都衝出嚟示威，而且一發不可收拾，英國政府解決唔到經濟民生問題，呢個「夠民主」嘅國家，就選擇咗解決出嚟示威嘅人囉，呢種處理手法，令人不滿都係合理。

至於一啲移英港人去信英國官員要求重新考慮法案嘅問題，筆者就有個「更大嘅問題」，有啲香港人唔係好鍾意示威抗議，甚至以幾多人「行出嚟」而引以為傲嘅咩？點解人去咗英國，就變得咁「乖純」，唔走上街頭抗議、反英國政府，而係選擇「去信政府」呢？如果按照違法「佔中」以至黑暴運動嘅做法，依家應該係所有移英港人都走出嚟抗議？係咪人去咗英國，就唔敢反抗英國政府，但喺香港就以為自己大晒、惡晒？

之前筆者已經唔止一次講過，有啲香港人，對香港特區政府同中央懷有特別惡意，但係對住西方國家嘅「洋主子」，就特別和顏悅色嘅，就算西方國家幾過分，佢哋都有理由去支持，或者只係以最低嘅力度去反對；今次有移英港人關注《公共秩序法案》修訂，道理亦係一樣，佢哋根本就唔敢大力反對英國政府，甚至認為英國政府「都有佢嘅道理」。

所以呢，西方國家行事有「雙重標準」，一啲攬炒派支持者包括移英港人，一樣係「雙重標準」。如果移英港人今次喺英國可以發揮佢哋嘅反政府創意，可能就會出現一陣「反XX」、「反YY」等「運動」，不過，呢一幕好難會出現，因為依家嘅移英港人，除咗有崇拜「洋主子」嘅心態，嚴格嚟講，佢哋只係寄人籬下，住喺人哋地方，唔好講咩示威權利，其實好多嘢根本無say，如果佢哋要求助，筆者會建議，佢哋可以搵好支持佢哋嘅末代港督—彭定康，等彭定康一邊食蛋撻，一邊諗計幫呢班「香港契仔」！