稀思路/筆是機場
喺上一篇文章，筆者分析過張秀賢「借錢事件簿」，指出張秀賢之所以可以問咁多人借到咁多錢，當中嘅根本原因，在於張秀賢嘅名氣以至影響力，完全係被攬炒派各路人馬吹捧出嚟嘅，佢就係借住呢份名氣嚟將個「借錢雪球」越滾越大；筆者喺文章尾段，仲講到呢場「借錢」風波，仲會繼續燒落去，文章寫唔夠兩三日就有最新進展，網上不開名「討債」嘅KOL，竟然倒返轉成為被攻擊對象，事件又再顯示出攬炒派內部嘅荒謬。借錢嘅人係咩人，大家先唔好評論，但如果借咗錢出去絕大部分款項都未收返，仲要比「同路人」攻擊，攬炒派係咪又喺度玩緊blame the victim （怪責受害者）呢？
筆者呢幾日一直喺度睇關於張秀賢同討債者嘅網上討論，發現咗兩個有趣現象，第一就係事件主角張秀賢，基本上喺部分攬炒派眼中，佢已經變咗節唔係「同路人」喇，對於攬炒派部分人士嚟講，呢個處理方法「最簡單」，張秀賢衰，除咗衰借錢，仲衰在已經投向其他陣營，所以攬炒派可以批評、遺棄佢，只要當佢唔係自己人，陣營內部嘅問題就「解決」咗喇，成件事真係夠「easy」！
第二個現象就如筆者開首所講，追債者已經成為被攻擊對象，而且係非常唔客氣嗰隻。張秀賢「借錢」事件之所以成為社會焦點，係因為KOL渾水喺網上面「不具名」地公開事件，呢幾日睇渾水嘅社交媒體，原來已經有人將佢「再黑化」，例如話佢講嘢有違事實，唔鬧當權者鬧其他人，甚至話佢係「熱狗」（即熱血公民人士，指人係「熱狗」除咗有貶意，亦有指人玩分化嘅意味）；當受害人可以變成「加害人」，攬炒派思維真係超乎常人想像。
關於渾仔呢個人，筆者先唔評論佢，但將心比己，如果有人借咗筆者一筆錢，唔還錢，唔好話上網唔開名講呢件事，就算係筆者入稟法庭追討，甚至申請對方破產等等，都係天經地義；掉返轉講，如果其他攬炒派分子先係受害者，又會點做？繼續唔出聲？因為借錢嘅係所謂「同路人」所以就由佢？如果追債、公開事件有錯，咁攬炒派嘅是非觀，真係一如喺其他事件一樣，都係鍾意掉轉嚟講。
張秀賢「借錢」事件，本來係攬炒派陣營嘅內部矛盾，大家睇完、笑完，基本上都唔關我哋事。但筆者仲好記得，之前無論係違法「佔中」定係黑暴運動，佢哋都好似表現得好齊心，依家又因為一個「錢」字，就即刻變成死敵，無論係借錢嘅、追錢嘅都要攻擊？說好的齊上齊落去咗邊？到目前為止，張秀賢到底確實爭人幾多錢，仍然係一個謎團，因為消息就指其實佢喺學生年代已經有借錢習慣，當初有份吹捧佢嘅人，包括KOL沈旭暉，喺網上發表「家書」論及張秀賢，聲稱係「難以入眠的新聞」，其實如果想入眠好簡單啫，當初有份捧到張秀賢天咁高，到咗今日，唔係咁衰唔幫佢呀？沈大師！
收藏
取消收藏
分享
