來論｜張秀賢歷盡滄桑　歸來竟為「借錢」？

稀思路/筆是機場

最近，一名攬炒派政客被指借錢唔還，而且受害人據報多達70人，一時之間，網絡上除咗出現一陣陣聲討潮之外，亦有唔少人瘋狂恥笑攬炒派，原來啲人表面講得幾正義都好，骨子裏唔單止無風骨，而且仲要借個政客名號嚟「借錢」，大家講緊邊個？相信唔需要筆者講，大家都知道係講緊前元朗區議員張秀賢，有人睇「借錢」問題，會睇成係攬炒派「內鬨」，而筆者睇到一個深層次問題，就係張秀賢之所以咁有「影響力」，令到咁多人「借錢」畀佢，其實講到底，係因為攬炒派有啲所謂KOL捧到佢天咁高，既然咁把炮，要借起錢上嚟，自然亦容易得多啦！

大約喺兩年多前，當時張秀賢要參選立法會功能界別，攬炒派KOL沈旭暉就同張秀賢有個對談節目，剩係睇條題已經夠勁，叫「歷盡滄桑，歸來還是少年：張秀賢由學生領袖到議員」，對談節目畀人感覺，就係係咁畀位張秀賢吹捧自己，沈旭暉喺節目又問張秀賢，佢出身中產，可以考公務員等等，做乜從政咁大「犧牲」，二人「鬥吹」一輪之後，張秀賢又講到做生意、參選理念，仲喺度宣傳佢「商貿之港，重現光芒」嘅理念，依家睇返轉頭，張秀賢嘅「商貿之道」，唔止有「光芒」，而且係「光芒萬丈」！

如果大家上網搜尋一下，會發現網上面仲有其他以前吹捧張秀賢嘅內容，例如某媒體就有一篇文章，大字標題寫「張秀賢是菁英」，內文提到「張秀賢中三時，即2008年加入環保觸覺，2012年是學民思潮的發言人，要同時兼顧社運和學業，所花精力是常人的兩倍，張入大學後，還精力充沛地當過學生會會長。換言之，張其實已戰鬥了9年，年紀雖輕，但已是政壇老將，可知其戰鬥力之驚人」，又指「他（張秀賢）政治經濟，有紋有路，我從來沒見到過這麼熟悉經濟議題的民主派/本土派，頗出意料之外。我早說了，我看政治人物，從來不看立場，只是擇優，總之是有才華的菁英，或有潛質的年輕人，我便支持，就是這個邏輯。」

睇以上內容，筆者就會覺得，以上說話係咪呃人呢？未必，張秀賢可能真係叻仔，但要注意嘅係，一個人叻，仲要睇佢嘅叻用喺咩地方，如果一個人叻而有用在適當嘅地方，咁當然係好事；但如果一個人叻，係用在反中亂港，最終無路可走，可能就會「越走越錯」，張秀賢可能就係一個例子。今次「眾借（錢）」事件，當好多人喺度諗點解張秀賢可以問到咁多人借錢嘅時候，其實根本原因，就係因為當初，佢係由一大班攬炒派人士捧出嚟，令佢喺圈子內有影響力，有咗影響力，借錢都當然容易啲啦。

從張秀賢事件，我哋仲會睇到一件事，張秀賢被指以「選舉開支」、「自己撞車，家人撞車」同「去台灣發展水果事業」等理由借錢，但又被揭發「買車、和女友去外國旅行幾個月」等等，如果事情屬實，算唔算係詐騙？點解畀佢呃嘅攬炒派分子，唔報警，而想畀機會佢改過？其實，呢種又算唔算係攬炒派鍾意「私了」嘅作風？借錢容易還錢難，睇嚟呢場「借錢」風波，仲會繼續「燒落去」。