點新聞
每日點新聞 點解香港事
標籤

來論|彭定康借拜年挑釁 黑白不分應受譴責!

稀思路/筆是機場

筆者寫呢篇文嘅時候,正正就係大年初三,即係「赤口」,所謂「赤口」,就係容易同人鬧交,盡量唔好拜年,不過,有啲人,包括外國嘅政客,好明顯係想人哋同佢「開年」!末代港督彭定康,出咗名反中亂港,即使佢已經唔係港督N咁多年,但依然成日借機抽水,抹黑中國。最近,佢就公開向全球港人拜年,不過,佢似乎唔係真心想拜年,而係又喺度借機抹黑中國,而且說話非常黑心,筆者想講,香港事,一早已經唔關佢事,如果佢咁鍾意關心人,不如關心下自己千瘡百孔嘅英國仲好啦!

就如先前嘅文章一樣,一啲擺明係抹黑、不實嘅言論,筆者唔會喺度幫人「賣廣告」嘅,但係呢,彭定康一啲扭曲是非嘅說話,筆者就必須指出係錯到離晒譜,例如佢提到有移居海外嘅港人「不得不流亡海外」呢部分,其實佢到底係咪真正了解香港發生咩事呢?一啲所謂嘅「流亡人士」,佢哋唔係受到政治迫害,而係佢哋真係喺香港涉嫌犯法,當中有涉及暴動嘅,有涉及其他嚴重罪行嘅,亦有涉及違反香港國安法嘅,與其話佢哋「流亡」,正確嘅講法,應該係有人棄保潛逃先啱,如果一個外國資深政客,連犯法嘅人都要包庇,咁佢嘅是非觀,就非常值得懷疑。

另外,當彭定康聲稱中央打壓香港自由嘅時候,其實同佢支持「逃犯」一樣,都係完全扭曲是非!自由,部分人例如黃絲以為有自由「做乜都得」。但事實係,你有自由,都有義務,其中最重要嘅義務,就包括唔可以違法同唔能夠因為自由而傷害他人。黑暴以來,極少部分黃絲唔係行使緊佢哋嘅自由權利,而係犯緊法;更嚴重者,更加係用不同手段去直接襲擊、傷害他人,筆者想問下彭定康,喺英國有冇呢種「自由」呢?如果無,反而佢認為有人可以「自由」之名,破壞香港?

有一點,彭定康肯定畀一般外國政客更清楚,就係香港回歸前後,都係行緊普通法,所有案件由專業法官作出審理,如果有人只係行使自由權利,唔會被法庭定罪;相反,如果有人係犯法,不論任何原因,包括政治理由,都唔會因為「自由」而免罪。彭定康一番說話,可能會氹到一班黃絲包括移英黃絲好開心,但彭定康忽略甚至蔑視咗一樣嘢,就係法理!將心比己,如果黑暴發生喺英國,筆者深信彭定康就唔會講得咁輕鬆,喺度做「花生友」。

自香港回歸祖國以來,香港嘅事,已經唔關英國事,更加唔關彭定康事,彭定康喺新年「衝出嚟」,除咗刷存在感,同班黃絲繼續圍爐取暖之外,實際作用係「零」;仲有一點,就係佢公開拍所謂賀年片時,條片嘅配樂係一首「港獨」歌曲,佢到底意欲何為?為咗討好黃絲、反政府人士,佢係咪連一首歌有違法、分裂中國嘅意味都唔理?彭定康嘅所謂賀年片,再次提醒咗我哋香港雖然已經回復穩定,但係外國勢力、外國政客仍然係非常熱衷於抹黑中央同香港,我哋必須謹慎,唔好低估各種風險!

稿件由上傳 · 文責自負 · 不代表本網立場
評論
相關新聞
相關度
相關度
從新到舊
從舊到新
搜全文 
全文
標題
關鍵字
goTop