稀思路/筆是機場
喺唔少攬炒派政客心目中，美國式民主係一種典範，甚至美國政客係佢哋嘅「主子」，佢哋情願聽美國話都唔願意忠於自己國家；不過，所謂美式民主，用一個字嚟形容，就係「亂」！美國總統在任時會被揭發種種不當，卸任後又可能會因不同事而被調查，今日共和黨攻擊民主黨，聽日民主黨又報復共和黨，最近，美國總統拜登就被揭發「私藏」機密文件，有報道指目前美國司法部長已經指派獨立特別檢察官調查事件；呢件事肯定會嚴重打擊拜登嘅管治威信，問題係，總統如果犯法，需唔需要負上刑責呢？
話說，喺拜登上任前曾使用嘅私人辦公室入面，被發現藏有佢喺擔任副總統時期嘅10份機密文件，之後佢助手又喺佢住所車庫發現多一批涉密文件，事件持續發酵。據報，拜登第一次被搜出嘅10份涉密文件，包括有美國情報備忘錄同簡報材料，內容涉及烏克蘭、伊朗同英國等。至於之後發現嘅一批涉密文件，亦係源於佢擔任副總統期間，早前白宮發言人表示，呢啲文件係拜登「唔小心放錯咗地方」，呢個解釋，大家認為係咪可以接受呢？
可能一般人唔太了解，拜登嘅私人辦公室或者住所，有一批政府文件「有咩大問題」，其實根據美國《總統檔案法》，每屆政府任期結束時，包括總統同副總統在內嘅離任官員，都要將所有涉密資料交畀國家檔案館保存；即係呢，拜登私藏文件，好可能已經犯咗法！美國國家安全局前承包商僱員斯諾登就公開表態，意指拜登似乎比好多「洩密者」攞走更多涉密文件，之前有前美國國安局僱員因為一份文件就被判囚5年，而拜登、特朗普、克林頓等，有人藏有幾十、幾百份文件，但唔使坐監。如果套用相同法理，筆者都好奇，拜登係咪都要坐監？同坐幾耐呢？
拜登嘅「文件門」事件，大家睇表面可以睇到兩個現象，第一當然係所謂「人人平等」嘅法律，喺美國當然係有啲人「比其他人更平等」啦，相信拜登今次就算被攻擊，都無乜可能會好似其他人咁要負刑責甚至坐監；第二就係美國號稱民主國家，但佢哋嘅政要，似乎守法意識就麻麻啦，上一任總統特朗普，一樣被指藏有涉密文件，而且有超過180份，因而受到司法部刑事調查。如果你問筆者拜登同特朗普嘅分別，筆者會覺得拜登因為係現任總統，「無事」嘅機會好高下，至於已經「唔係總統」嘅特朗普，就可能難搞少少，會唔會被檢控等，關鍵未必係美國嘅法治，而可能係佢仲剩返多少政治能量。
美國政治，除咗「亂」，其實仲可以用個「鬥」字嚟形容，喺共和黨掌控嘅眾議院，已經對民主黨包括拜登摩拳擦掌，包括有共和黨眾議員要調查拜登同佢屋企人嘅商業網絡、調查阿富汗撤軍行動，甚至要對眾議院前議長佩洛西等發起調查，當中涉及2021年1月嘅國會暴亂。依家美國總統係民主黨人（拜登），參選院控制權亦喺民主黨手上，不過眾議院控制權就喺共和黨手上（雖然唔夠穩固），兩黨點鬥法，鬥成咩地步，當然有待觀察；不過，有一點可以肯定嘅，就係過去幾十年甚至100年，啲學者、政治理論家趨之若鶩嘅西方民主，或者兩黨政治，走到今日，其實就算未至於分崩離析，但黨與黨之間嘅內耗，已經令唔同國家舉步維艱，今日好多西方國家嘅困局，根本而言唔係因為咩通脹、經濟問題，而係個政府、個體制無力解決問題，昔日嘅世界霸主，會唔會快將成為「昔日」？一齊放長雙眼睇下點。
收藏
取消收藏
分享
