自薦上獎門人 超蓮誤會JW爆粗嚇到呆

農曆新年將至，今晚（15日）播映的賀年特別版《獎門人新春感謝祭》，除了有「獎門人」曾志偉，帶領五位「獎老」外，還有「元老級獎老」林曉峰（阿Lo）回歸擔任主持。是集更是美女如雲，堪稱「最靚千金」的已故賭王何鴻燊女兒何超蓮首度現身，更傾盡全力玩。

何超蓮謂：「我自薦上嚟架，好想上嚟玩！」她不介意食「辣壽桃包」兼濕身之餘，還於「口噏噏」環節因錯誤解讀JW講粗口，搞到一頭霧水「天然呆」，全場爆笑。

一面對「鑽石級女神」大駕光臨，在場男士也瞬間變「怕醜綿羊仔」；當進行「坐波波」環節時，負責夾實氣球的Sean與Timothy一埋位已面青，超蓮忍唔住呻：「做咩啫？！我依家好恐怖咩？」話口未完，獎門人忽然無預警衝前坐爆Sean大腿上的波，為超蓮這位VVIP作親身示範，受「重創」的Sean即嚇到魂魄唔齊，Timothy見狀亦驚到震。玩得投入的超蓮來回跑跑跳跳，搞到索晒氣兼大嗌「腳軟」。

嬌滴滴的JW則施展「魚躍龍門」雙腳離地彈跳坐爆波，衝擊力之勁令Sean和Duncan面容扭曲恍如受刑，前者見JW飛撲埋嚟一刻更恐懼得大聲慘叫！身高嬌小的JW又遭獎老們連環攻擊，先是於「排排坐」期間被阿Lo暗寸：「有個別嘉賓企喺度，我又唔覺企喺度。」之後玩「開口中」時，JW向獎門人報寸被程浩駿從後偷襲掟Cream，怎料獲批准還擊的她再被「高人」程浩駿嘲諷：「你夠唔夠高架？」激到JW怒「抆」Cream報仇。