稀思路/筆是機場
被控違反香港國安法嘅壹傳媒創辦人黎智英，佢被控嘅罪行，係串謀勾結外國或者境外勢力危害國家安全等罪，當黎智英要聘用英國御用大律師Tim Owen為其辯護時，基本上法律界以至坊間都講過，無可能喺一宗涉及外部勢力嘅國安案件上，容許被告又引來「外國勢力」嘅律師嚟參與案件，只不過法庭依然故我，就算去到終審法院都依然批准黎智英聘用Tim Owen。近日，有新聞指黎智英嘅國際律師團隊已經去信英國政府，要求對方介入事件，即係，黎智英嘅「律師團」擺明車馬勾結外國勢力，咁亦佐證咗，當初社會各界對黎智英聘用Tim Owen嘅憂慮，百分百有道理！
按照BBC嘅報道，黎智英嘅國際律師團隊早前去信英國政府，形容黎智英案件有「象徵性」，又透露律師團隊先後向英國兩任外交大臣提出會面請求，第一次會面被拒，第二次「無聲氣」，但係英國政府本月初已經答應安排外交部大臣會晤。其他媒體報道，英國首相嘅發言人證實，外交部印太事務國務大臣卓雅敏同黎智英嘅法律團隊會面，又指當局向黎智英提供支援已經「有一段時間」，仲強調特區政府必須停止針對包括黎智英在內嘅「異見人士」，英方將繼續支持人權自由同法治。
呢件事，第一個亦係最重要嘅問題，在於黎智英被控串謀勾結外國或者境外勢力危害國家安全，外界擔憂佢請嘅外國律師會勾結勢力，已經唔係擔憂，而係鐵一般事實。之前關於黎智英要聘用Tim Owen一事，法庭內外爭議不絕，甚至全國人大常委會都就香港國安法嘅不同條文作出解釋，相關嘅國安漏洞，如果唔出手堵塞，大家就好可能會見到黎智英請嘅外國律師（包括國際律師團隊）法庭內為其抗辯之餘，喺法庭甚至喺香港之外，會用政治手段處理黎智英嘅問題，關於呢一點，我哋無可能接受同容許發生。
由此引伸落去，其實黎智英嘅國際律師團隊同英國政府更加係荒謬，例如英國政府表示自己將繼續支持「人權自由及法治」，大家理解到嘅法治，應該係如果一個人涉嫌犯罪，佢係有罪定無罪，應該交由法庭審理，如果黎智英涉嫌犯法，佢嘅團隊竟然搵外國政府介入，咁除咗係勾結外國勢力，更加係想用政治干預法庭，係破壞法治先真！筆者最想知道嘅係，黎智英一直要聘用嘅Tim Owen，喺呢件事上面到底有冇角色？如果有，Tim Owen到底做過啲乜！
特區政府日前就出新聞稿，表明強烈反對外國政府就黎智英案嘅干預，以及對特區政府嘅不實指控同批評，指出任何被告人企圖借用或勾結外國政治力量逃避應有嘅司法審判，都係公然破壞香港特區法治同干預內部事務，被告人行為亦極有可能構成藐視法庭。喺今次黎智英嘅國安案件上，大家都睇到外國勢力又喺度赤裸裸地干預香港司法，有兩個問題值得深究，第一係黎智英咁樣勾結外國勢力，係咪犯法呢？而佢嘅「法律團隊」熟知法律以至普通法原則，咁樣要求外國政府幫手諗計救黎智英，又係咪知法犯法？由黎智英決定「深入地」鼓動黑暴時，佢每行一步就錯一步，依家面臨重罪但似乎態度依然，呢種被控勾結外國勢力時再搵外國勢力「救自己」嘅手段，客觀效果，只會令自己罪加一等。
收藏
取消收藏
分享
