粵劇《呂布情傾貂蟬》於昨晚（8日）起一連兩晚於西九戲曲中心再度公演，上次因腳傷及感冒影響演出的文武生王志良，這次與及花旦林施穎首度重演，兩人演出超水準，獲班主彭美施（施姐）收貨之餘，王志良師父羅家英睇足全場，稱讚演出有進步兼熟練，更畀95分。
王志良上次因病在開場「試馬」一幕一度失手，這晚他「修復失地」，他從5尺高台以一字馬著找，彎腰近乎貼地。全塲觀眾三度掌聲叫好。謝幕時，施姐在台上說：「我好多謝各位演員用心演出，今晚王志良和林穎施絕對係超水準，我就好收貨，辛苦曬大家，最緊要觀眾鍾意睇。」至於王志良師父羅家英睇足全場，他在台上説：「和上次比較今次更為熟練，演得真係好好，我會畀95分，實在係抵讚。」
此外，昨晚更獲得不少圈中人到來捧場，包括陳美齡、葉童、江雪鷺、林建明、錢小豪、黎燕珊、劉家豪、梅小青等。
（點新聞特約記者陳惠芳報道）
收藏
取消收藏
分享
