稀思路/筆是機場
黑暴運動期間，筆者一直有個「諗唔明」嘅問題，警察如果要進入大學執法，係依法辦事，點解不同大學嘅學生以至暴徒，要阻止警察入大學呢？係咪阻止或者拖延到警察入大學，就叫成功「保衛」？如果因為要「保衛」某地方而令到自己被捕、被判囚，做呢啲事又係為咗咩？最近，9名因為「包圍」理大而被裁定暴動罪成嘅年輕男女，喺區域法院被判處入獄35個月至48個月，法官講到明為咗達到保護公眾利益同執法人員安全等，必須判處阻嚇性刑罰；其實，一班人要違法搞「保衛理大」，已經係愚笨至極，其他人為咗「救」一班犯法嘅人，又走去犯法，好可能當時係中咗黑暴毒太深，難以救藥。
根據案情，喺2019年11月，大批黑衣暴徒非法佔據香港理工大學，被警方包圍，有暴徒則喺理大外圍衝擊警方防線，有人投擲汽油彈，警方拘捕多人，其中9名男女早前被裁定暴動罪成，喺今個月22日判刑。法官李慶年指出，整場暴動維持約80分鐘，數十名示威者中有部分人投擲汽油彈，把主要幹道堵塞，表明法庭必須判處具阻嚇性刑罰，監禁係被告們嘅唯一選擇。睇公開資料，呢9名被告相當年輕，最細21歲，最大亦只不過36歲，佢哋當中有人係社工，有人係工程人員，如今因為「支援」其他犯法者而搞到自己犯法，令人無語。
對於呢件事，筆者一定要講句，首先係有人喺黑暴運動期間聽啲政客煽動，行出嚟非法集會、打人、放火、暴動等，已經係錯，而另一班人知道一班人犯法而被警方包圍，竟然話要「圍魏救趙」，救一班喺大學入面嘅暴徒，搞到自己都被控暴動，係咪太過政治上腦呢？大家可以諗返當時發生喺理大嘅事，暴徒們佔據理大，警察想入理大，一班暴徒用汽油彈等武器襲擊警方，有警員受傷，面對呢啲暴行，其他市民唔係要去「圍魏救趙」，而係要批評呢啲人，要求佢哋盡快自首先啱。
呢件案嘅特點，在於被判刑嘅被告，都非常年輕，由20歲出頭到30幾歲，一個又一個大好青年，就係因為被煽動，覺得要去「救人」，所以就去包圍理大或者警方，佢哋可能有不少錯誤觀念，包括有被告可能以為自己係去現場支援，有被告可能以為自己有暴力行為都唔會被捕；但事實證明，只要出現喺暴動現場，而且有份參與，就算實際上無使用暴力，都有可能被定罪。法官喺今次案件亦表示過，無證據顯示其中5名被告有親身使用暴力，重犯機會低，但都要判監35個月。
對於一宗又一宗黑暴案件，可能因為「案件太多」，公眾都開始淡忘或者忽略呢啲案件，但筆者想講，其實相關嘅法庭案件，應該更進一步畀唔同嘅年輕人知道，如果選擇犯法，就預咗要承擔罪責。攬炒派政客擅長以「民主、自由、公平」等做包裝，煽動年輕人「走出嚟」，但其實啲後生仔只要「走出嚟」，就算無親身使用武力，由於喺一場非法活動有參與或支持嘅角色，都有可能被定罪。可以概括一句，呢啲法庭案件，就係最佳嘅法治教育事例，讓年輕學生以此為鑑，切勿重複。近日，筆者喺網上面見到一啲攬炒派分子分享一啲政客喺獄中嘅生活，一時話有奶茶咖啡飲，一時話運動量足做掌上壓，一時又話「不斷閱讀寫作」，講真，唔好講到坐監或者還押係「好事」咁，己所不欲，勿施於人，亦勿再荼毒青年，唔該！
收藏
取消收藏
分享
