稀思路/筆是機場
攬炒派網台主持「傑斯」尹耀昇，因為喺節目發表煽動言論，又利用銀行戶口清洗超過1000萬元，原被控煽動、洗黑錢等超過10條罪，佢上個月承認一項串謀作出具煽動意圖嘅行為罪同3項洗黑錢罪，日前喺區域法院被判囚32個月；法官判刑時指出，被告身為網媒主持，節目流傳甚廣，案發時香港正經歷連串、持續且嚴重嘅暴力，被告喺呢種社會氛圍同環境下作出煽動，明顯是「火上加油」。不過，部分網民似乎仍然偏向支持「傑斯」，有網民稱「粗言穢語謾罵都唔代表有罪」、係「政見」問題，其實，單純謾罵同煽動係兩回事，一啲網民盲撐「傑斯」前，請先睇清楚真相。
睇返公開資料，法官就強調過，香港當時發生大規模暴動，「傑斯」喺呢個社會背景下煽動「港獨」、「私了」政府官員，又宣揚「35+初選」（非法「初選」），火上加油，加劇破壞社會安寧嘅風險。煽動「港獨」或者叫人「私了」官員等，呢啲係純粹「講粗口」？或者係單純嘅批評同謾罵嗎？「傑斯」嘅言行，明顯係煽動其他人犯法，作出暴力行為嘅犯法，煽動佢哋犯法嘅人，一樣犯法。
至於洗黑錢嘅罪行，其實概念一樣清晰，只要「傑斯」有籌集、非法處理所得嘅款項，佢都係罪責難逃。睇返案情，控罪指涉案金額超過1000萬元，9個月內共有413次提存或轉帳交易，「傑斯」指示其女助手協助處理財產，反映咗佢就係主腦；而案件涉及使用共8個戶口，「絕非簡單」。
當有人為「傑斯」喊冤嘅時候，不如大家用一個「第一身」嘅角度去諗，如果無罪，「傑斯」點解要認罪？例如，如果「傑斯」戶口內每一筆款項都係從正當途徑所得，然後亦係以合法手段去處理，佢絕對可以唔認罪，向法庭解釋呢啲款項來源。同樣道理，如果佢覺得自己無作出煽動行為，香港法庭嘅法官遵守《普通法》原則，只要有疑點，佢都可以脫罪。「傑斯」選擇認罪，最合理嘅解釋，係佢自己其身不正。
攬炒派支持者或者「黃人」，佢哋都有一種心態，就係唔理「自己人」做乜，犯咩罪，傷害咩人，佢哋都會覺得違法者係「啱」嘅，之前黑暴運動嘅案件，打人、縱火嘅，佢哋覺得被告們「無罪」；犯下香港國安法嘅，佢哋又覺得「無罪」，其實一切一切，都係因為佢哋政治立場先行，而忘記咗一樣好緊要嘅嘢，就係對錯！換個角度，如果煽動、教唆人犯法嘅人可以無罪，咁以後案件嘅唆使者、幕後黑手，恐怕都可以逍遙法外喇。
「傑斯」嘅案件，仲反映咗攬炒派喺黑暴運動期間一個問題，就係黑暴運動期間以至之後，到底有幾多人曾經借黑暴運動發起眾籌，然後有金錢又處理得「不明不白」呢？呢度又涉及兩個問題，首先係一啲政客或攬炒分子，佢哋幫涉嫌違法嘅人籌錢，有冇問題？仲有，如果有錢籌咗之後處得唔透明，咁咪好容易變咗有人借眾籌自肥？所以，黑暴運動雖然已經過去，但警方嘅執法工作仲要繼續，因為過去、現在以至將來，仲有人喺度食黑暴嘅「人血饅頭」，利用「自己人」嘅同情心，不斷「搵食」。
收藏
取消收藏
分享
