導演陳可辛及黃進最近接受 ViuTV節目《導演‧門》 訪問，大談當做導演的趣事及內幕。59歲陳可辛奪獎無數，黃進則憑《一念無明》獲得第53屆金馬獎最佳新導演、第23屆香港電影評論學會大獎最佳導演及第36屆香港電影金像獎新晉導演獎，更是陳可辛近十年最欣賞的導演。
59歲的陳可辛拍過多套經典電影如《金枝玉葉》、《甜蜜蜜》及《十月圍城》等，對於被指拍過好多類型電影，他笑言，「係咩類型都有，但唔關我事，唔係想挑戰自己，係為勢所迫，一定要拍唔同類型嘅電影，先可以吸引觀眾入場，所以我反對啲人話我係高票房導演，我嘅票房一啲都唔高，所以先不停喺度轉，令我能繼續拍電影。」
最近不少電影票房收幾千萬，一片唱好港片。陳可辛指其實是觀眾對票房的誤解，「拍香港電影要賺錢係不切實際，是無可能的事，觀眾以為有4000萬票房，4000萬是戲院收益，片主只能拎返40%收益，4000萬票房，只能拎返1600萬，但1600萬收益，仲要扣除500萬宣傳費，咁就剩返1100萬。」黃進亦表示遠比觀眾想像困難，陳可辛認同說，「所以要支持香港電影。」他又言好喜歡黃進講過的一句話：「電影應該要所有觀眾都睇得明，我好怕有啲導演會話，『你唔鍾意睇呀，我唔係拍畀你睇。』我覺得呢句嘢好不負責任。」
兩位導演都曾跟曾志偉合作，黃進就好感激對方。他說：「開拍《一念無明》我先找曾生才找余文樂，曾生肯做已經好大幫助，我好想做一個配搭，用主流演員，拍一啲非主流嘅題材，曾生睇咗劇本鍾意，然後肯做，其實已經將呢個配搭完成咗一半，佢唔肯做，我未必有信心說服余文樂演出，因為我完全唔識佢。」
陳可辛和曾志偉合作兩次，對方都可以獲獎，他說：「啲人話點解拍志偉兩次都可以攞獎，我嘅方法就係叫佢收斂一吓，其實佢演技好好，不過佢太喜歡演戲，亦太認真去演，有時聲量會太大聲會拆，因為我同佢夠熟，夠熟可以直接開口，好多人好怕佢，因為佢真係大哥，好多人唔敢出聲。」他又透露近日因為君如獲選焦點影人，所以重溫志偉以往的電影，其中一部就是《金雞》，「志偉做得好好，他純粹做一個櫃員機打劫阿金的人，他只係來了一晚，當客串，他無壓力，好放鬆，一來到就瞓，要踢他先叫得醒，然後朦朦朧朧咁講對白，結果演得好好。如果畀晒劇本，好認真去演，可能會演過頭。」
黃進聞言認同笑說，「當時佢好忙，周圍飛，一落機就即刻拍，嗰的時間佢係做得最好。」陳可辛笑和應道，「唔知道就最好，唔好知咁多。」黃進再補充，「佢有一個好強嘅導演腦袋，佢分咗一半出嚟，去睇你攞咩SHOT，幾時剪啦，然後佢唔想你剪，會做啲嘢等你剪唔到，但佢好清晰嘅，知你要呢樣嘢一定演畀你，佢係導演立場去諗。」
陳可辛入行38年，同過無數巨星合作，而每次都有好成績，問到有何方法同巨星溝通，他輕鬆說，「無咩竅門，最重要同演員互相信任，當然好多時達唔到呢樣嘢，唯有搵辦法，睇吓邊一個讓步，或者改劇本就個演員，如果個演員好硬凈，硬碰硬話其實自作自受。」然則哪位演員用最多時間建立關才可溝通？他想了一會指絕對是跟他三度合作，分別是2005年的《如果·愛》、2007年《投名狀》以及2011年《武俠》的金城武。他說：「佢係一個唔太想演戲嘅人，作為朋友問過佢，『你做咩唔拍呀，又推？』每次搵佢都起碼求半年，佢真係會搵100個理由去推，我唔啱做，我唔可以去無電腦網絡嘅地方拍戲，呢啲又唔得，佢梗有一個理由。」他更言金城武是個一個好主觀的人：「又係一個比較自覺嘅人，所以好難令佢覺得好自然，好舒服咁喺鏡頭面前，佢一定要搵到一個安全距離，先願意去做。」
陳可辛於2007年開拍《投名狀》，由李連杰和劉德華及金城武主演，三位一線演員合作如何找到平衡演員之間合作？陳可辛坦言三位一線男演員好難走在一起，因為同性多個一定有競爭，「最好避免一齊討論，記得有一次避唔到，就拗起上嚟，嗰場戲有啲嘢未解決，當時有啲慌張，拗起上嚟，只能同最相熟嗰個金城武講，『喂，你唔好加把口啦』。」該片最終在第27屆香港電影金像獎中奪得8個獎項，包括最佳導演及最佳電影，李連杰獲得最佳男主角。同年於台灣的第45屆金馬獎上，又獲得最佳劇情片、最佳導演及最佳視覺效果三個大獎。
至於和哪位演員能一拍即合？陳可辛馬上說：「同黎明都算一拍即合，佢同金城武完全相反，佢冇乜問好多問題，佢第一套戲就係《甜蜜蜜》，一嚟到，我就同佢講想拍一部咁嘅戲，佢話好，表示有興趣，嗰時啱啱完成演唱會，去咗佢屋企傾咗成晚，佢話好鍾意《雙城故事》，然後就講完，我就問佢細個嘅嘢，感情關係，佢比我嘅感覺好單純，佢有黎小軍(《甜蜜蜜》角色)感覺，好一拍即合，拍嘅時候，近乎我話點就點。」
陳可辛更提到當年如何令黎明由偶像歌手脫胎換骨變演員，「我同奚仲文去說服佢，你一定要剪頭髮，佢問要剪幾短，我話好短，一定要剪到你唔似黎明，佢話咁樣有啲難度，因為始終佢係一個偶像，一個歌手，唔可以幾個月變另一個人，當然剪短咗就會變得老土，咁佢叫我哋去佢屋企，再搵埋髮型師，大家一齊剪，攞個共識，我哋唔離譜，剪得嚟都留有餘地，攞到共識之後合作就無問題。」而黎明亦於1997年憑《甜蜜蜜》首獲影帝提名，2002年就以跟陳可辛再度合作的《三更之回家》打低5度提名的張國榮，獲得第39屆金馬獎最佳男主角。
（點新聞特約記者陳惠芳報道）
收藏
取消收藏
分享
