稀思路/筆是機場
2020年底，當名不經傳嘅羅健熙成為民主黨主席時，坊間都有相同嘅反應，就係「羅健熙係乜水？」、「民主黨真係無人才」等等，當時外界都預料，民主黨淪落到搵個連立法會議員都未做過嘅政客做主席，呢個黨嘅命運似乎係「命中注定」；接近兩年過去，民主黨果然越做越差，甚至依家連一個政黨嘅「形態」都無，呢啲絕對係羅健熙嘅「功績」。近日睇新聞，見到一單羅健熙「攬女」、爆房同不務正業嘅新聞，筆者更有預感，曾經風光一時嘅民主黨，更可能要衰喺羅健熙手上！
近日，《大公報》報道，指羅健熙「尋歡作樂 引發民主黨內訌」，睇晒成篇報道，大約就係民主黨本身已經江河日下，能唔能夠生存落去都唔知，但身為黨主席嘅羅健熙，竟然仲周街食煙、攬女爆房，玩「戀愛大過天」。羅嘅支持者可能會覺得，羅健熙都係男人，唔通香港唔畀人溝女咩？但大家要留意下，羅健熙溝嘅，係咩女仔先？
如果傳媒報道無誤，羅健熙嘅「女友」，係佢嘅助理，幫佢喺辦事處處理大小事務，問題嚟喇，呢位女仔係幾時成為羅健熙「女友」嘅呢？如果係佢入職後先成為羅嘅「女友」，係咪羅健熙借工作之便，去追辦事處嘅女仔？（唔好意思，講到呢度就諗起甘乃威）如果話呢個女仔未入職就係羅嘅「女友」，咁係咪代表羅喺自己辦事處「搵工」俾自己「女友」？一個政黨主席，如果利用職權追女仔，咁佢有人爆料，就係正義、大義滅親喇！
同羅健熙追女仔嘅問題類似，食煙唔犯法，喺街除口罩食煙犯法，更重要嘅係，羅健熙係一個公眾人物，唔係路人甲乙丙丁，而係一個「攬炒派大黨」嘅主席，連黨主席都周街除罩食煙，咁一般市民見到會點？不論係「追求」辦事處女生，定係當街除罩食煙，羅健熙作為一個公眾人物，都好應該向外界交代下。
如果從傳媒報道，可能會對羅健熙產生更大嘅負面觀感，而筆者睇羅健熙呢個人工作，就係佢在任咁耐，民主黨就衰咁耐；本來民主黨願意參加立法會選舉，呢個黨可能仲有一線生機，但喺羅健熙嘅「英明帶領」下，民主黨成為咗一個唔參選嘅政黨。係呀，身為政黨但唔參選立法會，咁民主黨仲有咩Power？答案就係無Power囉！
直到近期，羅健熙又發表過所謂「香港回歸25周年民主黨立場書」，借機抹黑特區政府。老實講，民主黨嘅思維，仲停留喺舊時代，依家已經係香港國安法實施、完善咗選舉制度嘅新時代，仲玩盲反、挑撥矛盾？無晒市場啦！如果民主黨仲想玩，首先就要覺悟，放棄以前嗰套抗爭思維；其次，可能就要認真諗諗，係咪要畀羅健熙做個「全職男朋友」，辭任黨主席，唔好再搞搞震，耽誤本身已經唔係好掂嘅民主黨喇！
收藏
取消收藏
分享
