點新聞
每日點新聞 點解香港事
標籤

來論|英國通脹升升升 移英黃絲夠錢用嗎?

筆是機場/稀思路

「有XX銀行大多數客戶的存款餘額只有約港幣4800元」、「XX有三分之一的兒童生活在貧窮中」、「生活成本飆升,XX人使用現金控制開支」,如果我哋唔睇細節,就咁睇以上嘅新聞內容,可能會覺得以上描述嘅,應該係一個「發展中」國家或者地區,但好抱歉,發生以上情況嘅地方,係英國包括倫敦,一個幾百年前就「雄霸」地球嘅國家,今日竟然搞到咁「窮困」,又一次證明民主不一定是好東西。而筆者想話俾大家知,未來情況可能更差,因為根據最新數字,英國通脹仲升緊,已經突破10%!

英國統局公布,英國7月消費物價指數(CPI)按年勁升10.1%,較對上一次公布數據9.4%仲要高,係1997年1月起統計系列新高,如果以統計局模擬通脹數據計算,更係1982年嘅新高,超過晒市場預期;如果計食品同非酒精飲料價格,按年升幅為12.7%,僅次於2008年8月所創年率13.2%。通脹得咁勁,難怪英國人紛紛罷工,要求加人工「抗通脹」。

喺香港,從政嘅人成日話「通脹猛如虎」,今日呢隻「老虎」就正在吞噬已經江可日下嘅英國,各行各業嘅人都上街要求加人工,由鐵路、機場、律師等,甚至連教師、護士在內嘅公務員都有;有英國工會、社會團體等更發起「忍無可忍」(Enough is Enough)行動,剩係計今個星期,都至少有50場罷工。英國嘅通脹問題,受到環球能源以至經濟影響,筆者觀察,通脹可能會持續,英國內部肯定有排亂。

點解筆者會話英國仲會有排亂?好簡單幾樣嘢,歐洲以至英國嘅能源危機,唔係英國自己所能解決;美國加息又唔係英國控制到;而英國人實則收入減少,消費亦自然會少啲,咁英國經濟又更難有起息。對付通脹,英國政府可以選擇加息,可以削減開支等,但呢啲招數幾十年前戴卓爾都用過,最後通脹回落,但同時搞到經濟衰退同失業率高。即係話,英國政府如果出招,可能遏到通脹但會令經濟更差;唔遏止通脹民眾又繼續示威,咁可以點搞?

英國嘅困境,正正再一次話俾全世界聽,西式民主國家,體制唔一定好;而所謂自由經濟,如果無適當嘅調節同介入,變咗放任嘅自由經濟,衰啲講就係經濟好就好,如果經濟唔好,理得你成個家庭無錢用,又或者兒童係咪生活喺貧窮中,一樣要捱餓。香港一啲人選擇移居海外,尤其鍾意去英國,唔知道如果佢哋「無飯開」,係咪都覺得「英國好」?筆者唔係講笑,最近就有新聞講,有移英黃絲向喺香港嘅舊同事借錢,人遠在英倫,要向喺香港嘅舊同事借錢,咁移民嚟做乜?

之前筆者已經講過,移民,應該係為咗更好嘅生活,如果有人移居海外,換來顛沛流離、捉襟見肘嘅生活,咁當初「為啖氣」移民,呢啖「氣」真係好貴。睇返香港,雖然無能源危機,但一樣有疫情,一樣受到美國加息影響,但香港六月份嘅消費物價指數(CPI),只係升咗1.8%,就算受第五波疫情影響,失業嘅可以申請資助,廣大市民又可以攞消費券。唔知道喺未來日子,仲有冇黃絲會越洋問返香港嘅親朋戚友借錢,但中國人有句話叫「長貧難顧」,如果唔夠錢用,可以考慮學啲攬炒派政客搞眾籌,反正同路人嘅錢係最易呃的!

評論
相關新聞
相關度
相關度
從新到舊
從舊到新
搜全文 
全文
標題
關鍵字
goTop