稀思路/筆是機場
有冇諗過，點解呢個世界咁多騙徒？有人可能會覺得，咁係因為呢個世界有太多立心不良嘅人講大話、去呃人；其實，呢個說法只係部分正確，呢個世界咁多騙徒，係因為有啲人容易呃，甚至甘願被呃。前排，香港四名青年逃犯落網，警方揭發佢哋原來成為咗「手足」嘅搖錢樹，被利用去眾籌，最後仲被遺棄，甚至被匿名舉報。事情發展到近日，就有周刊曝光四人嘅「自拍感恩」片，以及被指呃錢嘅「升旗易得道」主持人訪問，佢哋現身爆料指，要求幾個逃犯拍片，係要佢哋偷渡前預錄「遺言」，更反指有其他人利用逃犯籌款落格。不過事實係咪好似佢哋咁講？似乎唔係囉！
根據文匯報記者嘅了解，其實有關片段，唔係幾名青年逃犯「著草」前拍，而係早於去年9月至10月拍嘅，報道更指，「升旗易得道」同其他人士齊齊借逃犯搵食，而且對數千萬元「捐款」去向避而不談；當有人想講自己無借「手足」搵食，但又喺英國租住豪宅、生活寫意，筆者只會問一句，錢從何來？
今次利用「眾籌」、掠水一事，有啲攬炒派嘅支持者，會誤以為係警方「講大話」，誣蔑一直協助逃犯嘅「手足」，但其實呢班人要諗清楚，警方之前出嚟開記者會前，所得嘅資訊，正正係由幾名逃犯口中接收；如果有人話自己無利用「手足」，其實事情好簡單，就係相關人士籌咗幾多錢，用咗幾多錢，都清清楚楚向大家交代，攬炒派支持者信唔信佢哋，應該係睇事實，唔係靠斷估。
喺黑暴運動開始後，基本上大家都會喺網上見到攬炒派政客搞形形色色嘅眾籌，佢哋當中絕大部分組織或者人，都無清楚向攬炒派支持者交代過帳目；就算係有個別無牌組織有交代帳目，大家都可以見到有啲錢用咗喺啲「無厘頭」地方，例如係資助人搞活動、租音響或者「交流」。有人不斷籌錢，又有人不斷捐錢，呢啲荒謬事情唔止代表有人立心不良，而係有攬炒派支持者「甘於受騙」，畀人呃咗，仲唔願意接受事實。
講返今次現場說法、話其他人借逃犯籌款嘅「升旗易得道」主持人，筆者想知道佢哋依家到底以咩身份留喺英國，申請政治庇護嘅難民？用BNO移民英國嘅？定係本身有英國居留權？理論上，佢哋一直協助香港逃犯，佢哋都可能犯咗法，算係香港嘅逃犯，香港嘅執法部門係咪可以通緝佢哋？而英國政府，係咪又要「庇護」佢哋？某周刊厲害之處，在於記者搵到又訪問佢哋，而呢二人「厲害之處」，可能就在於自己涉嫌違法，竟然仲敢大搖大擺受訪。可能真係有攬炒派支持者當佢哋係「手足」，但對佢哋嚟講，攬炒派逃犯以及支持者，其實只係用嚟搵錢賺到笑嘅「首 Joke」先真！
歡迎到Apple/Google play store下載 「點新聞」app
iPhone App： http://apple.co/2MxsmE1
Android App： http://bit.ly/36EmZtD
華為App： https://urldra.cloud.huawei.com/ezfJy81ETm
或直接進入點新聞網站瀏覽最新最準的新聞資訊：
使用其他社交媒體訂閱點新聞
YouTube: youtube.com/c/dotdotnews點新聞
Instagram: instagram.com/dotdotnews
收藏
取消收藏
分享
