ViuTV原創青春電視劇《I SWIM》於本月22日播出大結局，結果被觀眾及網民鬧爆指劇集爛尾及「太膠」。演員之一的呂爵安(Edan)正忙於MIRROR演唱會綵排，收工後回家急忙在社交平台撰文撲火。
Edan在劇中角色衝動好勝，他在長文話：「有人問我，你會唔會好失望啊？真心嗰句，我自己真係冇嘅，反而好興幸自己有參與其中。拍攝嘅過程固然學到好多嘢，但原來一個作品出街，睇返整個作品，再睇返自己嘅表現，同觀眾嘅意見，係會再令自己學到更多嘢，令自己有所成長，而呢啲經驗，就係可以俾你用喺之後嘅演出 ，之後嘅作品上。」
Edan說，「今次李馬榮呢個角色，的確唔係自己做開嘅類型。當初做嘅時候，都好擔心自己會唔會太死咕咕，會唔會淨係演到個角色好死好唔自然，另一方面，又擔心大家會唔會睇唔慣，會唔會唔相信呢個角色。但係如果我因為驚就唔試，我就永遠都冇機會做其他類型嘅角色，大家就永遠都睇唔慣我做其他性格嘅角色，如果我因為擔心就唔試，咁其實……我乜都唔洗做㗎啦，上台表演都擔心㗎，咁係咪唔做啊？唔做，就唔會知自己有咩做得唔好，就唔會知自己有咩需要進步。可能有人今次睇唔慣，但經過今次之後，可能你就會睇得慣呢。可能今次做得未夠好，但經過今次之後，下次咪可以做好啲囉。所以，一定要做……其實有意見先會有進步，盲撐係唔好，但盲_亦都唔好，所以我哋係好歡迎啲客觀建設性嘅意見。唔怕老實講，我自己有時睇到啲負評都好confuse，話我唔緊要啊，講得啱嘅我會聽，然後盡力改。但有時我分唔到啲負評係因為本身唔鍾意我定點，搞到我都唔知take唔take好，不過都係嗰句，即係要再做好啲囉。
Edan指，「有討論其實真係一件好事，有人講好過冇人講。但我覺最緊要係大家要繼續支持香港嘅創作同製作（唔止係劇集啦）。成日問點解外國嘅好咁多，喂大佬人哋多咁多資源，多咁多人才，多咁多support。你幾可聽到一個後生仔話大個想做導演想做編劇？所以大家_嘅同時，都要繼續大大力支持，咁件事先會越嚟越好。覺得有問題有唔好嘅就俾意見，希望佢下次變好！」
（點新聞特約記者陳惠芳報道）
更多閱讀：
收藏
取消收藏
分享
