點新聞
每日點新聞 點解香港事
標籤

來論|攬炒派煽動人犯法?咪即係自己都犯法!

稀思路/筆是機場

筆者曾經同大家分享過一個「故事」,就係已經「走佬」去咗外國嘅攬炒派政客許智峯,喺網上發文煽動人投白票(也是杯葛立法會選舉),而喺香港,又有人響應許智峯、分享佢嘅貼文叫人投白票,結果就被檢控,之後仲被判監,緩刑18個月,而且仲要支付小額堂費。呢啲法庭新聞話畀我哋聽,有人作出犯法行為當然犯法,煽動人犯法,一樣係犯法,但歷史不斷重複,例如到近期,依然有人涉嫌煽惑他人違反防疫措施等而被捕。

保安局局長鄧炳強噚日(11日)出席立法會會議,表示喺第五波疫情中,有人喺社交平台自稱確診者並公然違反隔離規定,鼓吹確診市民四處傳播病毒,截至上月底,就已經有19人因為煽惑他人違反防疫措施、煽惑他人破壞政府防疫設施或發放虛假抗疫消息而被警方拘捕。

不論係許智峯煽動他人投白票,定係今次有人涉嫌煽惑他人違反防疫措施而被捕,當中嘅法理,其實都係好簡單,就係有人作出違法行為犯法,叫人犯法嘅一樣犯法;一個好簡單嘅例子,就係殺人者犯法,叫人殺人嘅都係犯法,甚至仲係罪行更重嘅主謀,將呢個法理引伸落去,煽動人投白票、煽惑人非法集結等等,一樣係犯法。

其實,一般人未必知道相關嘅法理,但攬炒派政客游走於政圈多時,唔少仲係有法律背景嘅,佢哋無可能唔知道受佢哋煽動嘅人,有可能會被捕甚至要坐監,許智峯呢啲明顯就係始作俑者;去到今次煽惑人違反防疫措施嘅人,呢一種「鼓勵」人犯法嘅歪風,明顯亦係來自攬炒派,因為由非法「佔中」開始,佢哋最叻就係叫人犯法,依家不斷有市民仿傚,都要「多謝」攬炒派嘅「教導」。

一啲行為被立法或定義為違法,背後一定有一套法理或者rationale,在疫情或者有公共衞生危機時,之所以有一套法律要求市民遵守防疫規定,係在於如果有人唔守法,例如唔戴口罩、唔願意隔離等,係會增加自己以至其他人感染病毒嘅風險;所以有人自己犯法或者煽惑人犯法,其實就係害緊成個香港。

大家唔好忘記,第五波疫情之所以爆發,係因為有個別嘅走漏個案進入咗社區。所以,執法部門嚴正執法,將涉嫌煽惑他人違反防疫措施嘅人拘捕,做法正確,而且亦係保護其他市民嘅唯一方法。一個更深層次嘅問題或者人性問題,就係有人如果明知自己嘅煽惑行為會危害到他人健康而仍然要做,咁佢哋同啲攬炒派政客都係一樣,自私!非常自私!

評論
相關新聞
相關度
相關度
從新到舊
從舊到新
搜全文 
全文
標題
關鍵字
goTop