點新聞
每日點新聞 點解香港事
標籤

壞消息!如果您收到以下電話 好大機會係騙徒

農曆新年將至,警方推出預防電話詐騙小貼士。(香港警察FB)

農曆新年將至,警方推出預防電話詐騙小貼士。警方指出,只要您有電話,您就會有機會墮入電話騙案嘅危險。2021年全年,警方一共錄得1140宗電話騙案,損失金額高達8.1億元,即係差唔多要中8次新年金多寶!您以為您係專業人士就可以有電話騙案免疫?Sor,唔係囉!如果您收到以下電話,同您傾計嘅人,好大機會係騙徒……

第一步:騙徒講得出您嘅個人資料,例如姓名、地址、電話、身份證號碼等。(唔係乜嘢咁神奇,今時今日資訊泛濫,要知道姓名呢類基本資料,一啲都唔難!)

(香港警察FB)

第二步:騙徒用有假蓋印,有埋您姓名、身份證號碼、甚至照片嘅假內地法院文件同埋假拘捕令去嚇您。

(香港警察FB)

第三步:騙徒仲會用以假亂真嘅執法機構網站,要求您輸入網上銀行帳戶登入資料同埋密碼。

(香港警察FB)

第四步:用「社會孤立」式心理操控,要您24小時視訊,同着住「制服」嘅騙徒保持通話,要您報告行蹤,仲唔俾您向任何人透露事件。

(香港警察FB)

第五步:騙徒要求您安裝一個叫「安全防衛」嘅木馬程式,目的係盜取您個人資料、網上銀行登入資料,及由網上銀行發出嘅一次性密碼。

(香港警察FB)

第六步:然後……仲然後?!一收到騙徒來電,梗係即刻收線啦!

(香港警察FB)

警方提醒您:

  • 切勿下載不明來歷的應用程式
  • 如果接到「+」字頭電話,但自稱係本地電話,好有可能係詐騙電話
  • 收到陌生人來電要求提供個人資料,緊記立即收線,同埋主動核實來電者身份。

「提防騙子,由您開始,記得提醒身邊人呀!」。

評論
相關新聞
相關度
相關度
從新到舊
從舊到新
搜全文 
全文
標題
關鍵字
goTop