筆是機場/稀思路
從事某啲行業嘅人成日會話「No news is good news」（無新聞就係好新聞），因為在某啲行業而言，「無新聞」就即係無意外等發生，絕對係好事。噚日（12日）立法會舉行第一次會議，特首林鄭月娥更出席答問大會，解答議員問題；對於一啲人嚟講，立法會正常地開，特首又如常去答問題，好似唔係咩新聞，但筆者想講，立法會能夠正常、順暢地開會，絕對係一單大新聞！點解？等筆者同大家溫故知新，喺度講返段往事俾大家重溫下先。
2016年嘅立法會換屆選舉，當時社會已經出現咗「泛政治化」歪風，果時有「港獨派」、「本土派」打住反中亂港甚至搞「港獨」嘅旗號，成功欺騙到選民繼而晉身立法會；不過，越玩越過火嘅一班亂港政客，竟然敢喺宣誓時「玩嘢」，有人讀「超慢」誓詞，有人展示「HONG KONG IS NOT CHINA」標語，甚至喺誓詞中加入粗口，最後當然係宣誓無效。喺之後嘅會議，有亂港分子因為被拒進入會議廳，繼而發起咗一場衝擊行動，之後議員被DQ、因衝擊而定罪等事情，相信大家都仲記得。
對比返2016年立法會開局，再睇返噚日嘅立法會大會，前者用三個字嚟形容就係「亂糟糟」，後者用三個字嚟形容就係「真開會」，所以筆者話噚日立法會大會順利、有序地開會係大新聞，真係一啲都無講錯；當中原因，其實非常簡單，就係自亂港分子絕跡於立法會後，由上年開始，議會已經逐步回復正常，而今屆立法會係中央完善選舉制度後嘅第一次立法會會期，喺確保「愛國者治港」嘅原則下，依家所有立法會議員都係愛國愛港人士，立法會自然地和平、有序。呢個好局面雖然係意料中事，但大家真係要好好珍惜；由噚日嘅會議大家亦會睇到一件事，就係中央當初下定決心完善香港嘅選舉制度，真係充滿智慧。
講返噚日嘅立法會大會，亦即係特首嘅答問大會，筆者留意到一個事情，就係立法會議員問嘅事情，都係同經濟、民生、房屋等相關嘅重大議題，而且唔少議員們問嘅時候都有紋有路，例如有議員問《基本法》第23條嘅時候，攞埋新加坡一部可以參考嘅法案嚟講；有議員問到防疫漏洞時，就清楚點出免機組人員檢疫嘅政策上，出現咗明顯嘅「漏招」。呢種論政風格理性得嚟，又帶一點辛辣，完全做到立法會既要配合亦要監督政府嘅重要角色。
更為重要嘅係，睇勻成個答問大會，之前嘅議會歪風已經完全消失，例如過往「衝擊多過開會」嘅情況已經絕跡，擺明借問問題嚟侮辱官員嘅情況亦已經唔存在，其他例如搞政治對抗、借機抹黑警方等情況，都「消失於天與地」。筆者想指出，立法會能夠回復正軌，能夠專心做嘢，同我哋廣大市民有好大關係；過去，因為「拉布」、衝擊等歪風，立法會一直好難配合到特區政府解決住房、融入國家規劃等問題，依家立法會已經撥亂反正，一啲「拖咗N年」嘅問題，係時候喺政府主導同立法會配合、監督嘅新環境下解決。全國政協副主席梁振英日前表示，香港未來幾年或者係最後嘅機遇，如果突破目前困局，香港前景會一片遼闊。筆者就認為，要突破困局，一班立法會議員要加油、好好努力！
收藏
取消收藏
分享
