筆是機場/稀思路
喺港產片世界入面，不時都會有一啲似是而非嘅歪理，例如電影入面會有江湖大哥同啲手下講，「唔緊要，你依家係做錯事，唔係做壞事」，令到人可能誤會，原來係壞人做嘅壞事裡頭，都仲有「壞事」、「錯事」之分；而喺攬炒派政客嘅世界，當然亦有類似嘅歪理，例如一啲被檢控嘅政客，就算自己認咗罪，都唔會覺得自己有錯，最近已解散香港分部嘅「學生動源」前召集人鍾翰林承認分裂國家及洗黑錢兩罪時，就稱「我認罪，我問心無愧」。犯咗罪，點樣問心無愧？又或者，如果問心無愧，又為何要認罪？唔好玩啦！
現年20歲嘅鍾翰林，噚日就身穿深藍色西裝上庭，承認一項分裂國家罪同一項洗黑錢罪，但就否認另一項洗黑錢罪同一項串謀發表煽動性刊物罪；佢喺答辯嘅時候，就表示「我認罪，我問心無愧」，俾國安法指定法官、區院法官陳廣池提醒，被告只需回答認罪與否，千祈唔好有任何政治宣言。鍾翰林呢種疑似想借法庭做政治騷嘅做法，過去一直都有攬炒派政客咁做，但筆者覺得呢種做法極度傻，依家鍾係俾人告緊犯國安法，佢如果擺明向法庭表示自己「無愧」、「無錯」或者「無歉意」，係咪想坐耐啲？
鍾翰林今次之所以被控重罪，因為去年香港國安法生效後，鍾翰林雖然聲稱「學生動源」停止香港事務，但其專頁仍有介紹列明「建立擁有獨立主權的香港共和國」，未有移除義工招募連結；另外，仲有繼續發帖聲稱「一國兩制」消亡等等，甚至喺「學生動源美國分部」同「創制獨立黨」成立前分別開設其專頁，透過另一管理員「Yoshi HK」發布「港獨」帖文。從案情嚟睇，基本上鍾翰林可以話係罪證確鑿，喺佢面前就可能只有認罪呢條路可以行，但佢認罪得嚟又要「型，既顯示佢無悔意，甚至係教壞人！
老實講，鍾翰林之說，絕對係有矛盾嘅，佢既然係犯咗法、認埋罪，咁點可能係問心無愧？又或者，如果佢真係問心無愧，根本就唔需要認罪，可以交由法庭去裁決。我哋從案情以至犯罪嘅本質嚟睇，其實喺任何國家、地區，分裂國家都為法律所不容許，最明顯嘅例子，就係之前西班牙加泰隆尼亞嘅「獨派」搞獨立，結果被西班牙當局「拉人封艇」，多名主事者被重囚；所以嚴格嚟講，鍾翰林係犯咗彌天大錯先真，如果其他人有樣學樣，肯定亦難逃罪責。
喺國安法已經落實嘅時代，攬炒派過往嘅攬炒行為、分離言行以至極端思想，全部都已經行唔通，甚至可以話係「無市場」，如果仲有人諗住抗爭、攬炒甚至奪權，就有可能成為下一個鍾翰林。最近，有啲已經走佬到外國嘅政客，公開叫人杯葛嚟緊嘅立法會換屆選舉，如果有市民咁傻豬聽佢哋講，極可能會墮入法網。綜觀攬炒派過往嘅行動，好多都係依靠用不同方式煽動人抗爭甚至違法；但依家不論係鍾翰林講「問心無愧」，抑或係走佬政客叫人杯葛選舉，相信用處唔會好大。如果有人信佢哋繼而行動，分分鐘成為「下一個佢哋」，香港人，千祈唔好做傻仔！
收藏
取消收藏
分享
