來論｜千萬豪宅供完未？　鄺俊宇撐暴最終「攬炒」自己

筆是機場/稀思路

「知唔知咩係神呀？神以前都係人，不過佢做到人做唔到嘅野，之後佢就係神！」曾幾何時，攬炒派有一位「神」，名叫「鄺神」，即係鄺俊宇，由於他在黑暴期間頻頻出現在暴亂現場「支援」黑暴分子，所以其鋒芒「一時無兩」，甚至同許智峯被認定係「可以支持的民主黨成員」。不過，支持黑暴、想玩攬炒，終有代價，最新消息，就係鄺俊宇宣誓無效，即時被DQ，連僅有嘅區議員資格都無埋，大家話，鄺俊宇算唔算攬炒自己呢？

政府早前安排最後一批區議員宣誓，涉及新界西幾個區議會，最新消息有16人宣誓無效，即時被DQ（取消議員資格），而且五年內不得參選，當中包括因涉及攬炒派「初選案」但未被起訴嘅區議員鄺俊宇；其他議員方面，較為熟悉的名字就有黃偉賢、伍軒宏以至王進洋等人。本來，鄺俊宇係立法會議員加區議員，每月薪酬超過十萬元，如今失去所有議員資格（立法會議員是他主動辭去），豈非變成「雙失已完」？真係陰公豬！

對於鄺俊宇變成「雙失已完」，筆者最關心的是，就是他仲有冇錢供樓？還是已經或準備賣樓？事源在去年7月，即是還有零星黑暴之時，就有報道指鄺俊宇「頗為富貴」，報住估值超過1100萬元的大角咀私樓；據悉該樓盤在2018年6月開售，而鄺俊宇所買的417平方呎單位，售價可能超過1100萬元，以鄺俊宇考會考英文六次先合格的「底子」而言，能夠買到千萬豪宅，都算是勵志故事。不過，由他決定參與黑暴運動開始，他的「命運」已經寫在牆上！

老實講，如果在一般時勢，立法會議員買樓有冇錯？十萬元一個月人工，買貴少少的私樓又有冇錯？都無錯！問題在於，2019年黑暴運動，不止是一場場暴動，而是一場意圖奪取管治權的顛覆活動，不在議會的「港獨」分子選擇參與，他們或要負上刑責；至於當時為立法會議員或區議員的攬炒派政客，包括鄺俊宇，作為要擁護《基本法》、效忠特區的議員，加入「攬炒政府」行列，最終變成「雙失已完」，根本就是「抵死」！

本來，鄺俊宇係民主黨以至攬炒派的明日之星，曾經在立法會「超級區議會」選舉取得接近50萬票，不過，一子錯，滿盤皆落索，今日鄺俊宇的下場，完全是自己造成。由鄺俊宇這個「高峰插落低谷」的例子，筆者在想，到底「老一派」的攬炒派政團，包括民主黨、公民黨等，其實仲有咩存在價值呢？論選舉，呢班曾經想「攬炒」香港的政團都未必可以再參選；論社會運動，年輕一代根本就不支持他們。

近年，大家都不時聽到有人叫民主黨「摺咗佢」，依家民主黨連其「明日之星」鄺俊宇都正式「收工」，其實民主黨有冇需要解散？或者改為做聯誼會，等佢哋一班人自己「懷緬」下以前曾在立法會（或立法局）有十幾個議員的「威水」往事？在新選制、新氣象下，其實香港真係未必仲需要「只懂反對」的攬炒「舊電池」。