點新聞
每日點新聞 點解香港事
標籤

來論|黑暴分子的「阻擋線」 不能再讓記協作惡多端

筆是機場/稀思路

早前,有傳媒踢爆記協秘密銷毀疑似包含會員資料的文件,事隔一段時間,記協就高調聲稱「資料被盜」,大有「惡人先告狀」嘅感覺。其實,不論記協有冇銷毀會員資料,佢嘅「罪證」都絕對唔會煙銷雲散,有傳媒日前就總結咗記協嘅六大罪行,包括盲撐「黑記」挑戰法紀、選擇性捍衛同業以至抹黑特區政府等;筆者就諗,如果教協、612黑暴基金等攬炒派嘅縱暴組織要解散,記協近年作惡多端,根本無可能可以留低!

黑暴運動期間,經常出現一個阻礙執法嘅情況,就係當黑暴分子與警方對峙時,明明警察可以上前執法,但黑暴分子面前就有一班「記者」阻擋住警方推進,佢哋當中有真記者,但有啲人嘅所屬媒體可能大家聽都未聽過;尤其甚者,喺衝突現時更試過「黑記」化身示威者,包圍、追住市民嚟鬧。但記協有冇批評過「黑記」或者假記者呢?唔見有!記協「反其道而行」,仲想屈警方「濫用」武力,甚至司法挑戰警方,話警方「妨礙採訪」,咁無理嘅司法挑戰,結果當然係敗訴。

所謂一不離二,記協嘅惡行當然唔止得咁少。記協全名,叫「香港記者協會」,其「目標」開宗名義表明「作為記者工會,我們以記者的利益為依歸,除爭取改善工作環境外,並著眼消除所有不合理的採訪障礙」,不過,記協講就講得好聽,做果時梗係包庇「自己友」,忽略其他人啦!例如去年8月,大公報記者俾前立法會議員許智峯等暴徒包圍禁錮,記協就未有維護新聞同業權益,亦未有譴責許智峯等人;前年8月,環球時報記者喺香港機場俾暴徒毆打、禁錮,記協甚至想將矛頭指向內地記者。

事實上,記協嘅存在,好似就係為咗同政府「對著幹」咁款,就算係發表年報,都以「紅線扼殺自由」、「危城下的自由」以及「破碎的自由」等說法,喺度散播恐懼。筆者做人好老實,由2019年到2020年香港國安法制定前,香港點解變「危城」?原因係因為黑暴分子打砸搶燒,甚至殺人放火嘛,記協咁「正義」,點解唔去譴責下啲暴徒?又或者講明暴徒暴力令記者安全都受到威脅?當記協全力偏向黑暴分子,好明顯記協不可能係記者組織,而係一個反政府甚至反中央政府嘅攬炒派組織。

據傳媒報道,記協喺2019年同香港外國記者會同國際特赦組織香港分會合辦人權新聞獎,造謠抹黑新疆有所謂「再教育營地」的BBC北京分社獲獎;到去年5月,其執委公開向外國媒體抹黑香港國安法。筆者諗到嘅第一個問題,就係香港國安法實施後,到底記協有冇任何涉嫌觸犯香港國安法嘅行為?再進一步,就係記協多年來如何與外部勢力「勾連」,資金來源係咩,有咩會員,包括有冇青少年或年幼學生會員。如果612黑暴基金受到警方調查,記協都應該「一定有份」!

記協以往利用其「記者組織」身份盡情地抹黑特區政府,喺中央制定香港國安法後,呢支歌仔肯定以後「無得唱」,問題在於,社會以至執法部門,係咪仲要容忍記協繼續喺香港「暗地裡」反中亂港,不時走出嚟借機攻擊政府甚至警隊呢?星星之火,可以燎原,當不斷出現學生、青年「記者」以記協會員身份「傳承」記協嘅「反政府」精神時,我哋唔單止要諗記協有冇犯法,更加要諗如果記協一直危害社會,係咪需要取締佢,以絕後患。

評論
相關新聞
相關度
相關度
從新到舊
從舊到新
搜全文 
全文
標題
關鍵字
goTop