點新聞 | 每日點新聞 點解香港事

每日點新聞 點解香港事
下載APP
標籤

靚湯讚馬明開明大度 唔會唔畀拍親熱戲

靚湯(左)表示與馬神在戲中有超多對手戲。

馬德鐘 (馬神)、湯洛雯 (靚湯)、陳煒、何廣沛、郭柏妍、蔣家旻、徐榮、姜大衛、白彪、翟威廉及陳庭欣等,今日(3日)到將軍澳電視城出席新劇《雙生陌生人》 拜神 ,劇中一人分飾兩角的馬神,拜完神監製叫他要食兩份燒肉,生果都要雙份。

靚湯表示與馬神在戲中有超多對手戲,因他既是男二又是男一。馬神就說:「係並列男一。」靚湯指馬神飾演其舊情人,之後他卻不辭而別,但又想翻撻補償。馬神指他因為拋棄了靚湯所以想作出補償,而他卻有老婆陳煒。

靚湯指,新劇中與馬神暫未有親熱戲。

靚湯表示二人暫未有親熱戲,問到男友馬國明(馬明)會否唔畀她拍親熱戲?靚湯笑說:「如果劇情需都會拍,佢一定唔會唔畀,我都冇要求佢唔拍,佢都可以,不過我拍拖之後都未試過拍錫戲,如果拍之前都會講聲,上次同譚俊彥拍 (親熱戲)係拍拖之前拍嘅,對我嚟講都有啲激,(唔畀男友睇?)男友九秒九睇咗。」馬神笑指馬國明不是唔畀靚湯拍親熱戲,只是唔畀和他拍。

近日靚湯為拍《雙》劇經常要到郊外的農莊拍攝,O型血的她大呻雙手及雙腳都被蚊叮到布滿紅點,並大讚馬神識自備防曬及蚊怕水,都後悔婉拒了對方的好意。馬神稱羨慕靚湯曬極都唔黑,不像他就算已搽了50度防曬,依然曬黑了很多。靚湯笑指他們的膚色一白一黑,都替打燈的工作人員辛苦。

5月6日是靚湯的34歲生日,她透露暫定會香港一日遊,可能會去行山或去主題樂園staycation。問到男友已返港可以一起慶祝會否開心些?她笑說:「依家有視像好方便,唔似以前Daddy個年代要打長途電話,(但依家可以摸到個人?)我哋呢啲係靈魂交。」記者笑指他們是神交,靚湯只笑而不語。

何廣沛和郭柏妍在劇中會有感情線,更不乏對手戲,而何廣沛透露在劇中他的感情線周旋於郭柏妍和蔣家旻之間,構成一段三角戀,十分好艷福。問到他最後情歸何處時,他笑稱想兩者兼得:「監製仍未寫到,兩個都想要喎,手掌係肉,手背又係肉,不過要畀『甜頭』監製,等佢寫多幾場感情戲畀自己。(唔怕朱晨麗嬲?)又關佢事?」

郭柏妍表示今次飾演見習律師,跟飾演師爺的何廣沛是同事關係,早前她都有睇深宵時分重播,何廣沛也有份演出的《律政強人》作參考,並趁機認識這位拍檔。

郭柏妍(右)今次飾演見習律師,跟飾演師爺的何廣沛是同事關係。

仍未卸任港姐的郭柏妍,今次已第二次参與劇集演出,之前她曾於《白色強人II》演出,但戲份不多,而今次在劇中戲份多了,她坦言心情少不免緊張:「所以事前做咗好多功課,亦會熟讀劇本先入廠。」問到郭柏妍拍感情戲可有底線?港姐出身的她說:「只要角色需要我都可以接受,相信公司寫得嘅尺度都唔會太過火,本身亦都冇港姐包袱,就算角色要我唔化妝出鏡都可以。」何廣沛卻直言不敢素顏示人,並笑指後生女對自己真有信心。

(點新聞記者梁靜儀報道)

收藏收藏
取消收藏取消收藏
稿件由上傳 · 文責自負 · 不代表本網立場

靚湯讚馬明開明大度 唔會唔畀拍親熱戲

收藏收藏
取消收藏取消收藏
稿件由上傳 · 文責自負 · 不代表本網立場
相關推薦