$8都呃！網民怒斥買$12鯪魚肉　街市魚檔收$20無找續

【點新聞報道】購物找續時常會發生爭拗！有網民近日到美孚荔灣街市某魚檔買12元鯪魚肉，付上2張10元紙鈔，惟店員不但未有找續，更大聲夾惡反指樓主只是給了1張10元紙鈔，及1個2元硬幣。樓主據理力爭要求檢查錢兜，以及翻看閉路電視，都被對方一一拒絕。樓主遂發文公審，怒斥「$8都呃」！

該名網民在fb群組「超市關注組」發帖講述事發經過，指日前到美孚荔灣街市某魚檔，買12元的鯪魚肉，向店員付上2張10元紙鈔，理應找續8元。不過，店員收錢後就行至後方雪櫃，樓主以為對方「無散銀找，要去拎」，但過了一會發現唔對路，於是大聲講「阿姐，未找錢呀！」。然而對方卻當耳邊風，「叫咗3次，都扮聽唔到，要隔離肉檔呀姐出聲再講未找錢先擰返轉頭」。

樓主表示，該店員回過頭來，便開始大聲夾惡反指事主只是給了1張10元紙鈔，以及1個2元硬幣。樓主不忿稱：「我完全無畀過散銀佢，佢都可以作得出話有畀$2硬幣」，故要求對方檢查錢兜，以及翻看閉路電視。但店員一一被拒，仲要話「仲要話成個錢兜都係$10紙」。樓主不滿對方態度，「我講嘢，佢仲要大聲過你，蓋過我把聲」，怒斥「$8都呃」。

不少網民批評涉事魚檔博大霧，應該報警處理，「就算冇CCTV證明，你報警佢都會驚，因為落口供會做少咗生意得不償失。但你要有時間」、「其實，你應該報警，警察嚟落口供，睇CCTV，佢都唔使做生意啦！邊個損失大？係我就同佢玩啦！」、「唔係話幾蚊嘅問題，佢覺得呢招掂，又呃下一個囉」、「佢玩得一次 ，一定有下次。依D行為 遲早要還。」

有網民就建議凡去所有街市，付款時一定要講清楚，「我都曾試過，所以去D唔熟店買嘢，我比錢時會講『呢到有廿蚊』，等大家都知道我比咗幾多錢，要找的」、「平時畀50蚊紙一百蚊紙嗰啲，要大聲嗌出嚟！即係而家畀20蚊都要大大聲嗌出嚟！要畀埋其他人知！」、「我而家出去買餸，俾錢時都會大大聲同佢講俾咗幾多」。