茶餐廳熱奶茶杯勁厚身　網民封為「古惑的杯」

【點新聞報道】港式奶茶是香港飲食文化特色之一。近日有網民幫襯本地一間茶餐廳時，發現使用的熱飲杯杯身勁厚，變相杯內飲品份量變少，質疑「隻杯咁都得」。有網民笑言是「古惑的杯」、「神奇偷雞杯」、「港式奶茶Expresso」。

該名網民在fb群組「香港茶餐廳及美食關注組」發帖，近日幫襯一間茶餐廳時，發現其使用的奶茶杯與常見的不一樣，杯身勁厚、杯內再「加厚」了一層，令他不禁質疑「隻杯咁都得」。從其上載的照片可見，熱飲杯的容量確實變得更細。

帖文引起網民熱議，不少網民認為餐廳「無良」，「勁唔抵飲，飲兩啖就無」、「厚啲，份量少啲」、「個杯咁厚，1杯其實半杯」，「防漏設計仲唔謝恩」、「其實水值得幾多錢，真係無良」。有網民笑言是「古惑的杯」、「神奇偷雞杯」、「港式奶茶Expresso」。

不過，有人認為味道才是重點，「重質不重量，係唔好飲嘅呢個杯size都嫌佢大」、「最緊要係好唔好飲，若果唔好飲幾大杯都冇用」。