張致恒獲地盤工友讚不絕口　網民提醒小心錢銀轇轕

藝人張致恒（Steven）早前終於完成建造業強制性基本安全訓練課程（平安卡），成為「職安真漢子」掙錢養家。近日有地盤工友於社交平台發文透露在開工時遇到張致恒，更晒出兩人的合照作證，大讚Steven勤力、冇架子，「真係見到佢係好俾心機做嘢，同事都係讚不絕口」。

該名工友在社交平台Threads發相發文表示，「繼兩日前講咗真係撞見Steven Cheung，係真係見到，仲要同一個櫃，話冇圖嗰啲。相處共事過之後，只能夠講耳聽為虛、眼見為實、唔建議信晒fb 傳媒嗰啲，畢竟人設係佢哋俾嘅，點樣寫都係佢哋決定嘅，都同佢講咗加油，俾心機，我問可唔可以合照佢係零拒絕，冇架子，冇脾氣的。真係見到佢係好俾心機做嘢，同事都係讚不絕口」。

工友強調，「我只後用同事身份分享佢作上嘅態度同付出，並唔係用其他身份去講，唔建議公私不分。」他又指，「其實我都只係講返工態度上佢真係好過太多揸流攤嘅人，好多人就會將佢嘅家事同公事混為一談，覺得佢份人係咁樣做嘢都一定會差」。

網民對此反應兩極，有人提醒工友小心與Steven有錢銀轇轕，「有冇問你借錢」、「你試吓借幾皮俾佢」、「唔知如果你係債主打唔打得出上面段嘢」、「希望你唔會成為下一個苦主」。不過 ，也有網民認為Steven形象差是因為不時被老婆雯雯公開數臭所致，「踩得佢最多嘅好似係佢老婆」、「男人最緊要娶到好老婆」、「佢最頹係依家嘅人設係由佢老婆幫佢建立」等。

有網民就為Steven打氣，「總之，加油努力啦」、「佢都努力做返個人，大家就放過佢吧，唔好好似佢老婆發癲咁」。