移英港人呻勤奮工作不獲賞識　網民揶揄：有得做都偷笑啦

話說不少人都話難以打入英國職場圈子，有移英港人就教路「吹水能力重要過工作能力」，話香港人勤奮、肯博肯捱、轉數快的優點，在英國人眼中通通都是缺點喎。有網民揶揄「班BNO有得做都偷笑啦、仲嫌三嫌四，醫護，律師過到去都係要炒散，有得揀咩？」

該名移英港人在社交平台發文分析點解香港人在英國撈唔起，笑言「當社交媒體上見到港人話：香港人有好多優點，勤奮肯博肯捱，轉數快，喺英國一定搵到食。我就知佢撈得唔多掂」，皆因英國人重視social networking (美其名為teamwork)多於工作能力同質量。

樓主解釋箇中理由，就是英國人無法忍受同無聊的人一齊工作，「佢哋忍受唔到星期一返到公司你無法滔滔不絕講wekend的time log」，所以要反其道而行，吹水能力重要過工作能力。

樓主又提到「英國人講究程序、流程正確」，因為只要所有人都按照程序去做，才可以搵到程序上的漏洞，改善流程。樓主語帶嘲諷地表示，「世界點變、市場點變、科技點變、經濟點變、法規點變，佢哋唔L在乎，要個客就套服務，唔好講客制化、顧客體驗，唔好諗投訴，告返個客abuse員工仲得」。

有網民亦分享睇法，指「當亞洲人太勤力，有比較，而令白人同事被上司覺得懶，或者亞洲人太勤力做新project/idea而而加重白人上司、同事或下屬工作量，就會被人覺得好乞人憎了。」