移英港男座駕被偷「凍過水」　幸獲好心人助失而復得

不少移民英國的港人都話偷車、入屋爆竊、扒手真係多，但只要沒人命損傷，當地警方都係做下樣，唔會有結果。不過，在眾多壞消息，總叫做有啲安慰，因為移英港男的座駕被偷後，竟然搵得番，但唔好以為係警察做到嘢，只不過是有當地人發現失車並報警揭發，所以事主話，要「真心好多謝嗰位無名英雄」。

該名移民英國諾定咸（Nottingham）的港男日前於fb群組「英國香港人生活交流區」發文，指於當地時間上月24日凌晨4時許，發現停泊於前花園的福特座駕不翼而飛，並即時報警，亦已打定輸數，「心想呢次架車都凍過水，唉，都已經諗定下晝去睇車」。

豈料，當地警方翌日突然找上門，稱已尋回事主的失車，並可載他與妻子認領車輛。港男當時心想「架車都拆得七七八八，可以拆走嘅都拆走，但都好過屍都見唔到」。經過約10分鐘車程，行經一條隱秘小路後，夫婦兩人下車便見到座駕被泊於一處住宅車房前的樹底位置，港男形容「正常你唔係小路入面住嘅人的話，基本無人會見到架車」，更好彩是事主發現只係車尾啲工具唔見咗之外，架車係完好無缺。

兩人追問警員找回失車的方法，對方指有當地人看到他的失車帖文，剛好又看到失車被泊於寓所附近便報警。港男得悉後，直呼「真心好多謝嗰位無名英雄！Is my hero!」。後來，警員表示難以找到賊人，建議他們放棄追查。

事後，港男相信福特汽車屬高危對象，提醒一眾在英港人要多加注意，駕駛後必須將車匙放置於能夠切斷訊號的儲存袋，否則容易令賊人有機可乘。