來論丨不顧事實亂噏抹黑　史墨客「散水」又「抽水」

稀思路/筆是機場

以美國為首嘅外部勢力，喺評論、干預香港事務時，佢哋都會有意無意間顯露一樣嘢，就係將事情「掉轉嚟講」，例如黑暴運動，佢哋可以講成「美麗的風景線」、「香港人企出嚟爭取民主自由」，但事實呢？事實係暴徒打砸搶燒，嚴重破壞香港。最近，美國駐港澳總領事史墨客即將離任，就喺一個智庫網上講座上，聲稱北京「違背承諾、破壞香港高度自治」，又稱要「讓香港做回香港」。其實，香港一直都係香港，如果香港同之前有唔同，就係因為攬炒派同暴徒破壞，中央果斷出手，令香港成為更繁榮、穩定嘅香港。

睇新聞報道，史墨客嘅論調，大概就係香港喺回歸初期運作良好，但中央以至港府嘅行動動搖咗香港昔日根基等等。史墨客所講嘅嘢，完完全全係外部勢力抹黑香港嘅講法，但筆者想問，到底近年發生過咩事，令中央出手，為香港撥亂反正呢？

2019年6月，因為《逃犯條例》修訂問題，攬炒派喺外部勢力嘅支持下，發動咗一場規模大、破壞深嘅黑暴運動，當時唔止執法嘅警察受到襲擊，連一般市民都受到暴徒襲擊，甚至被火燒、被掟磚，羅伯被暴徒用磚頭掟死，就係一個例子；當時無論係美國、英國以至其他美西國家，唔譴責暴徒暴力，反而抹黑港府以至中央政府，唔知道史墨客如何評價黑暴運動呢？係咪同佩洛西一樣，認為黑暴其實係「美麗嘅風景線」？

喺香港最為危急嘅時候，中央政府將黑暴問題睇得透徹，於是制定香港國安法，之後又有攬炒派想借選舉推倒特區政府，中央亦完善咗香港嘅選舉制度。種種問題嘅癥結，在於攬炒派（甚至連同外部勢力）旨在要喺香港奪權，仲綁架埋香港嘅治安、民生，中央出手止暴制亂，如果史墨客係公允評論，事情應該係中央出手穩住香港嘅局面，而絕對唔係咩破壞香港自治。如果套用史墨客本身嘅說法，之前美國有示威者衝擊國會山莊，係咪執法嘅美國警察以至政府都係錯誤呢？好心就唔好雙重標準啦！

留意事情嘅最新發展，原來史墨客日前仲喺一個活動上，抹黑香港國安法，稱國安法「削弱香港自治」，筆者想講，呢個完全係一個笑話，講起國安法，之前就有傳媒統計過，美國嘅國安法，數目可能超過20條，涵蓋範圍極廣（實際法例數目或有出入），相比之下，中央為香港制定嘅國安法，只針對幾大罪行，而且極有必要性；如果史墨客咁講，美國嘅國安法，係咪都削弱緊美國？又或者，點解西方國家就可以有國安法，但中國香港就唔可以有？當美國政客面不紅、氣不喘地抺黑香港特區甚至中央前，筆者要講句，你哋睇下自己先啦！

坦白講，外部勢力抹黑香港甚至中央，唔係今日嘅事，如果暴動發生喺美國，係罪無可恕，但發生喺香港，點解會變成「正義行動」呢？道理根本就講唔過去！當有啲香港人以為外部勢力「幫緊」香港嘅時候，其實外部勢力一直都只係借香港特區嚟干預甚至打擊中國。如果到今日，仍然有人認為可以依仗外部勢力，俾外部勢力干預香港，筆者會同大家講，世上有太多例子，喺美國干預後，人民生活更差，治安更加惡劣；如果香港特區唔係有中央支持住，依家嘅香港，情況可能比黑暴運動時更差，情況差得難以想象。